Nashik News : पाच लाखांचे दागिने चोरी; दोघा सराईतांना नाशिक पोलिसांना घेतले ताब्यात

तबरेज शेख 

नाशिक : नाशिकला भाच्याच्या घरी पाहुणा म्हणून गेलेल्या एका व्यक्तीचे तब्बल पाच लाखांचे दागिने चोरी झाल्याची घटना घडली होती. या प्रकरणी पोलिसात दाखल तक्रारीवरून दागिने चोरी करणाऱ्या दोघा सराईतांना नाशिक पोलिसांनी अटक केली. गंगापूर पोलिस ठाण्याच्या गुन्हे शोध पथकाने ही कारवाई केली.

भारत खरात व महेश शिरसाठ अशी पोलिसांनी ताब्यात घेतलेल्या दोघा संशयितांची नावे आहेत. दरम्यान जामनेर येथे वास्तव्यास असलेले भाऊराव घाटे हे रक्षाबंधनानिमित्ताने नाशिकच्या (Nashik) शिवाजीनगर येथे राहणाऱ्या भाच्याकडे गेले होते. यावेळी सोबत त्यांनी सोन्याचे दागिने देखील आणले होते. मात्र भारत व महेश यांनी पाच लाख रुपये किंमतीचे दागिने चोरी केले होते. दागिने चोरी झाल्याचे लक्षात येताच भाऊराव घाटे यांनी पोलिसात तक्रार दिली. 

पोलीस पथक (Nashik Police) या गुन्ह्याचा तपास करत असतांना संशयित खरात हा जुन्नर (पुणे) येथे मिळून आला. त्याच्या चौकशीत महेश शिरसाठ याचे नाव समोर आले. त्याला देखील संगमनेर येथून अटक करण्यात आली. यानंतर पोलिसांनी दोघांकडून ५ लाख ३६ हजाराचे दागिने हस्तगत करण्यात आली. संशयितांकडून घरफोडीचे गुन्हे उघडकीस येणार असल्याची माहिती निरीक्षक जग्वेंद्रसिंग राजपूत यांनी दिली.