Nashik : वाटेत अंघोळ केल्यावर चक्कर येऊन कोसळले; देवीच्या दर्शनाला पायी जाणाऱ्या भाविकाचा मृत्यू

अजय सोनवणे
नाशिक : चैत्र उत्सवानिमित्त सप्तशृंगी देवीच्या दर्शनासाठी भाविक मोठ्या संख्येने गडावर जात आहेत. यात हजारो भाविक पायी प्रवास करत जात दर्शनासाठी जात आहेत. अशाच प्रकारे पायी प्रवासा करत जाणाऱ्या एका वृद्ध भाविकाचा मृत्यू झाल्याची घटना आज दुपारच्या सुमारास घडली. भाविकाने शेतात अंघोळ केल्यानंतर मृत्यू झाल्याची दुर्दैवी घटना घडली.

नाशिकच्या देवळा तालुक्यातील विठेवाडी येथे गुरुवारी घडली. धुळे जिल्ह्यातील सांगवी येथील कैलास बुधा सोनवणे (वय ६०) असे मृत झालेल्या भाविकाचे नाव आहे. दरम्यान चैत्र उत्सवासाठी सप्तशृंगी गडावर दर्शनासाठी जात आहेत. तीव्र उन्हात देखील अनेक भाविक पायी दिंडी करत दर्शनासाठी जात आहेत. अशाच प्रकारे कैलास सोनवणे हे देखील पायी गडावर जाण्यासाठी सांगवी (ता. शिरपूर) येथून निघाले होते.  

पाणी पाहून अंघोळीसाठी थांबले
पायी जात असताना कैलास सोनवणे हे विठेवाडी परिसरातील भालचंद्र निकम यांच्या शेतात थांबले. या शेतात पाणी सुरु असल्याने ते पाहून थांबले. याठिकाणी त्यांनी अंघोळ केली. अंघोळ केल्यानंतर त्यांना सकाळी सुमारे ११ ते १२ वाजेच्या दरम्यान चक्कर आली आणि ते अंघोळीच्या ठिकाणीच कोसळले. यातच त्यांचा घटनास्थळीच त्यांचा मृत्यू झाल्याचे सांगण्यात येत आहे.

उष्माघाताने मृत्यू झाल्याची शक्यता
आजूबाजूच्या परिसरातील तसेच पायी जाणाऱ्या भाविकांनी त्यांना रुग्णालयात नेले. मात्र त्यापूर्वीच त्यांचा मृत्यू झाला होता. प्राथमिक माहितीवरून मृत्यूचे नेमके कारण उष्माघात किंवा हृदयविकाराचा झटका असल्याचा अंदाज व्यक्त करण्यात येत आहे. यानंतर देवळा ग्रामीण रुग्णालयात शवविच्छेदनासाठी मृतदेह दाखल करण्यात आला आहे. तर देवळा पोलीस या प्रकरणी अधिक तपास करीत आहे.