Nashik Crime News: नाशिकमध्ये गावगुंडांची दहशत! दगडफेक करत वाहनांची तोडफोड; नागरिकांमध्ये भितीचे वातावरण

तबरेज शेख प्रतिनिधी...

Nashik Crime News: गेल्या काही दिवसांपासून नाशिक शहरात गावगुंडांची दहशत पाहायला मिळत आहे. शहरातील विविध भागात वाहनांची तोडफोड केल्याच्या घटना समोर आल्या होत्या. स्वातंत्र्यदिनानिमित्त कडक बंदोबस्त असताना शहरात पुन्हा एकदा असाच प्रकार समोर आला असून चारचाकी गाड्या फोडल्याचा प्रकार समोर आला आहे.

याबाबत अधिक माहिती अशी की, एकीकडे देशभरात स्वातंत्र्यदिनाचा जल्लोश सुरू असतानाच नाशिकमध्ये (Nashik) मात्र गावगुंडांची दहशत माजवल्याचे पाहायला मिळाले. शहरातील मखमलाबाद रोड परिसरात दगडफेक करत अज्ञातांकडून दोन चारचाकी वाहनांची तोडफोड करण्यात आली.

पहाटेच्या सुमारास परिसरातील इनोव्हा आणि अल्टो कारची तोडफोड करण्यात आली असून या घटनेत गाड्यांचे मोठे नुकसान झाले आहे. स्वातंत्र्यदिनानिमित्त शहरात कडक बंदोबस्त असताना घडलेल्या या घटनेमुळे नागरिकांमध्ये भितीचे वातावरण पसरले आहे.

चार दिवसांपूर्वी झाली होती दोघांची हत्या..

दरम्यान, नाशिक शहरातील वाढती गुन्हेगारी सध्या चिंतेचा विषय ठरत आहे. काही दिवसांपूर्वीच नाशिकमधील अंबड परिसरात दोघा भावांची घरात घुसून हत्या करण्यात आली होती. या भयंकर घटनेने संपूर्ण शहरात खळबळ उडाली होती. लहान मुलांच्या भांडणाचा वाद वाढत गेल्याने या हत्या झाल्याचे समोर आले होते. (Latest Marathi News)