Nashik Crime : फर्निचर मॉलवर धाडसी दरोडा; सुरक्षारक्षकाला डांबून ठेवत तांब्या पितळाच्या भांड्यांसह लाखोंचा ऐवज लांबविला

अजय सोनवणे 

मनमाड (नाशिक) : नाशिक- छत्रपती संभाजीनगर महामार्गावर अंदरसुल येथील जीवन फर्निचर मॉलवर रात्रीच्या वेळी धाडसी दरोडा टाकण्यात आला आहे. मॉलमधील सुरक्षा रक्षकाला चाकूचा धाक दाखवून हा दरोडा टाकण्यात आला आहे. यात दरोडेखोरांनी तांबे- पितळेच्या भांड्यांसह इलेक्ट्रॉनिक साहित्य मिळून लाखोंचा ऐवज चोरी केला. 

नाशिकच्या (Nashik) येवला तालुक्यातील अंदरसुल येथील नाशिक- छत्रपती संभाजीनगर महामार्गावर असलेल्या जीवन फर्निचर या नावाने गृहीउपयोगी वस्तूंचा मॉल आहे. या मॉलवर मध्यरात्रीच्या सुमारास पाच जणांच्या टोळक्याने धाडसी दरोडा टाकला आहे. मॉलच्या रखवालीसाठी असलेले बशीर पठाण व काशिनाथ निकम यां सुरक्षारक्षकांना चाकूचा धाक दाखवत चोरट्यांनी डांबून ठेवले. यानंतर मॉलच्या पाठीमागील बाजूचे शटर वाकवून आत प्रवेश केला. 

दरोडेखोरांनी मॉलमधून साधारण १०० किलो तांब्याची भांडी, २० किलो पितळची भांडी, १२ टीव्ही संच, कुलर, सिलिंग, फॅन मिक्सर, इंडक्शन सेट यासह सिक्युरिटी कॅमेऱ्याचा डीव्हीआर सेट देखील चोरी करण्यात आली आहे. या (Crime News) दरोड्यात चोरीचे साहित्य नेण्यासाठी चोरट्यांनी छोटा हत्ती पिकअप वाहनाचा देखील वापर केला असल्याची माहिती मॉल संचालक सुधीर सुराडे यांनी दिली आहे. घटनेबाबत पोलिसांना माहिती देण्यात आल्यानंतर पोलिसांनी घटनास्थळी येत पाहणी केली. घटनेचा पुढील तपास येवला तालुका पोलीस करत आहेत.