तबरेज शेख| नाशिक, ता. २४ ऑगस्ट २०२४
राज्यात हिट अँड रन अपघातांची मालिका काही थांबत नसल्याचे चित्र दिसत आहे. काल पुण्याजवळील दौंडमध्ये भरधाव कंटेनरने चौघांना उडवल्याची घटना घडली होती. या अपघाताची बातमी ताजी असतानाच नाशिकमध्ये एका शासकीय अधिकाऱ्याने मद्यधुंद अवस्थेत कार चालवत चार वाहनांना धडक दिल्याची घटना समोर आली आहे.
याबाबत सविस्तर माहिती अशी की, नाशिकमध्ये हिट अँड रनची धक्कादायक घटना समोर आली आहे. समाजकल्याण विभागाच्या अधिक्षकाने मद्यधुंद अवस्थेत कार चालवत रस्त्याकडेला उभ्या असलेल्या तीन वाहनांना धडक दिली. सुदैवाने या दुर्घटनेत कोणतीही जिवीतहानी झाली असून नसून दोन चारचाकी गाड्यांसह एका दुचाकीचे मोठ्या प्रमाणात नुकसान झाले आहे.
विजय चव्हाण (वय, ५६ वर्ष) असे या शासकीय अधिकाऱ्याचे नाव असून ते समाजकल्याण विभागामध्ये अधीक्षक पदावर कार्यरत आहेत. शुक्रवारी (दि.२३ ऑगस्ट) रात्री साडे अकराच्या सुमारास त्यांनी मद्यधुंद अवस्थेत गाडी चालवत पोर्णिमा स्टॉपजवळ असलेल्या तीन वाहनांना धडक दिली, यामध्ये तीनही गाड्यांचे मोठ्या प्रमाणात नुकसान झाले.
दरम्यान, या प्रकरणी विजय चव्हाण यास ताब्यात घेतले असून भद्रकाली पोलीस स्टेशनमध्ये गुन्हा दाखल करण्यात आला आहे. आज त्यांना न्यायालयात हजर केले जाणार असून या दुर्घटनेत कोणीही जखमी झाले नसल्याची माहिती भद्रकाली पोलीस स्टेशनचे अधिक्षक श्रीनिवास देशमुख यांनी दिली आहे. याप्रकरणी अधिक तपास सुरू आहे.
सकाळ+चे सदस्य व्हा
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.