Nashik Crime: पोटात दुखू लागल्याने हॉस्पिटलमध्ये गेला.. दुसऱ्या दिवशी तळघरात मृतदेह आढळला; नाशिकमध्ये खळबळ

तबरेज शेख, नाशिक|ता. १३ एप्रिल २०२४

नाशिक रोड येथील नवीन बिटको हॉस्पिटलच्या तळघरात नवीन नाशिक येथे राहणाऱ्या एका रुग्णाचा मृतदेह आढळून आल्याने खळबळ उडाली आहे. या धक्कादायक प्रकारामुळे नवीन बिटको हॉस्पिटलच्या सुरक्षेचा प्रश्न पुन्हा एकदा निर्माण झाला आहे. पोलीस या प्रकरणाचा अधिक तपास करत आहेत.

समोर आलेल्या माहितीनुसार, आकाश किरण काळे (वय, ३८ रा. इंदिरा वसाहत नवी. नाशिक) असे या मृत रुग्णाचे नाव आहे. आकाश काळे हा नेहमी मद्य सेवन करीत असल्याने त्याला पोटामध्ये त्रास होत होता. त्यामुळे दिनांक 10 एप्रिल रोजी त्याला उपचारासाठी नवीन बिटको हॉस्पिटलमध्ये दाखल करण्यात आले होते. मात्र दिनांक 11 एप्रिल रोजी रात्री साडेअकरा वाजेच्या दरम्यान त्याने रुग्णालयातून पळ काढला.

दुसऱ्या दिवशी त्याचे नातेवाईक रुग्णालयात आले असता तो बेडवर आढळून आला नाही. त्यामुळे नातेवाईक व त्याच्या मित्र परिवाराने शोध घेतला. परंतु आकाश कुठेच न सापडल्याने अखेर सीसीटीव्ही कॅमेराचे फुटेज तपासले असता तो तळघरातील जिना उतरून खाली जाताना दिसला त्यानंतर तळघरात थेट त्याचा मृतदेह आढळला.

दरम्यान, याबाबतची माहिती नाशिक रोड पोलिसांना समजताच वरिष्ठ पोलीस निरीक्षक रामदास शेळके व त्यांच्या सहकाऱ्यांनी तातडीने घटनास्थळी येऊन चौकशी केली. या प्रकरणावरुन नातेवाईकांनी रुग्णालय प्रशासनाला धारेवर धरले आहे.

रुग्ण रुग्णालयातून बाहेर जात असताना डॉक्टर किंवा इतर कर्मचाऱ्यांचे लक्ष नव्हते का? हॉस्पिटलमध्ये मोठ्या प्रमाणात खाजगी सुरक्षा आहे. हे सुरक्षा कर्मचारी झोपा काढत होते का? असा संतप्त सवाल नागरिक व इतर रुग्णांच्या नातेवाईकांनी उपस्थित केला आहे.