सागवान लाकडाच्‍या २२ खाटा जप्‍त; बेकायदेशीर सुरू होती विक्री

नंदुरबार : धडगाव शहरातील बाजारपेठेत सागवान लाकडाच्या बेकायदेशीर खाटा तयार करून विक्री केली जात होती. या विक्री करणाऱ्यांवर वन विभागाने कारवाई करत २२ खाटा जप्त केल्‍या. (nandurbar-news-forest-department-22-beds-of-teak-wood-seized-The-sale-was-started-illegally)

धडगाव वनविभागाच्या परिक्षेत्रातील जंगलातून बेकायदेशीररित्या सागवान लाकडांची तोड करून खाटा तयार केल्‍या जात होत्‍या. या खाटा धडगाव शहरातील मुख्य बाजारपेठेत विक्रीसाठी आणलेल्या विक्रेत्यांकडून वनविभागाने २२ खाटा जप्त करत कारवाई केली आहे. वन विभागाच्या माहितीनुसार सदर खाटांची किंमत एकूण ४३ हजार २०० रुपये आहे.

माल सोडून विक्रेते गायब

धडगाव तालुक्यातील खेड्या पाड्यावरून शहरात बाजाराच्या दिवशी तयार सागवानी लाकडाच्या खाटा विक्रेते मोठ्या संख्येने घेऊन येत असल्याची तक्रार होती. यावर वन विभागाने कारवाई सुरु करत शहरातील स्टेट बँकेसमोर तयार खाटा विक्रीसाठी बसलेल्या विक्रेत्यांकडून सुमारे २२ सागवानी लाकडाच्या खाटा ताब्यात घेत कारवाई केली. वन विभागाच्या या धडक कारवाई मुळे अवैध लाकडी वस्तू बनवून विकणार्यांचे धाबे दणाणले असून अनेक खाटा विक्रेत्यांनी मुद्देमाल सोडून घटनास्थळावरून पोबारा केल्याने वन कर्मचार्यांच्या हाती केवळ २२ खाटा लागल्या. सदर कारवाईबाबत वनरक्षक धडगाव यांनी वन गुन्हा नोंद करून आरोपींचा शोध सुरु केला आहे.