Navapur News : नवापूरमध्ये भाजपला धक्का; भरत गावितांचा मित्र पक्षात प्रवेश, निवडणूकीच्या रिंगणात उतरण्याची तयारी

सागर निकवाडे 

नंदुरबार : विधानसभा निवडणुकीचा बिगुल वाजल्यानंतर प्रत्येक मतदार संघात राजकीय पक्षांची तयारी सुरु आहे. उमेदवारी मिळविण्यासाठी इच्छुकांची देखील भाऊगर्दी पाहण्यास मिळत आहे. अशातच काही नाराज पदाधिकारी पक्ष सोडून दुसऱ्या पक्षात प्रवेश करत आहेत. अशाच प्रकारे नावापुरमधून भाजपकडून उमेदवारी न मिळाल्याने भरत गावित यांनी भाजपला रामराम ठोकत अजित पवार गटात प्रवेश केला आहे.

नंदुरबारच्या (Nandurbar) माजी खासदार माणिकराव गावित यांचे सुपुत्र भरत गावित हे नवापूर विधानसभा निवडणूक लढवण्यासाठी आग्रही होते. यासाठी त्यांनी भाजपकडे उमेदवारीची मागणी देखील केली होती. मात्र उमेदवारी मिळत नसल्याचे चित्र पाहून त्यांनी भाजपला रामराम ठोकला आहे. यानंतर त्यांनी मुंबईत उपमुख्यमंत्री अजित पवार व सुनील तटकरे यांच्या उपस्थितीत राष्ट्रवादी अजित पवार पक्षात अधिकृत प्रवेश केला आहे.  

उमेदवारीबाबत अजूनही प्रश्नचिन्ह 

नवापूर (Navapur) विधानसभा मतदारसंघातून भरत गावित हे इच्छुक आहेत. दरम्यान भाजपकडून (BJP) उमेदवारीचे तिकीट मिळत नसल्याचे चित्र असल्याने त्यांनी अजित पवार गटात प्रवेश केला. मात्र पक्ष प्रवेश झाला असला तरी नवापूर विधानसभेसाठी त्यांना राष्ट्रवादीकडून उमेदवारी मिळेल का? हे पाहणं महत्त्वाचं असणार आहे.