Beed Crime : बीडमध्ये भर रस्त्यावर गोळीबार; एक जण गंभीर जखमी, पोलिसात गुन्हा दाखल

बीड : बीडमध्ये एक धक्कादायक घटना समोर आली आहे. बीडच्या मुळकवाडी येथे भर रस्त्यावर गोळीबार केल्याची घटना घडली आहे. यामध्ये एक जण गंभीर जखमी झाला असून त्याला बीडच्या जिल्हा रुग्णालयात उपचारासाठी दाखल करण्यात आले आहे. संदीप तांदळे असं जखमी व्यक्तीचे नाव आहे.

बीडच्या (Beed) मांजरसुंबा ते लिंबागणेश रोड दरम्यान असलेल्या मुळकवाडी येथे सदरची घटना सकाळच्या सुमारास घडली. या घटनेत मूळकवाडी येथे संदीप तांदळे हा उभा होता. यावेळी त्या ठिकाणी आलेल्या बाळा बांगर यांच्यासह (Crime News) अन्य दोघांनी त्या ठिकाणी येत संदीप तांदळे यांच्या दिशेने चार राऊंड फायर केले. यामध्ये संदीप तांदळे हे जखमी झाले असून त्यांच्यावर बीडच्या जिल्हा रुग्णालयात उपचार सुरू आहेत. 

पोलिसात गुन्हा दाखल 

दरम्यान या प्रकरणात बीडच्या नेकनूर पोलीस ठाण्यात तिघा विरोधात गुन्हा दाखल करण्यात आल्याची माहिती सहाय्यक पोलीस निरीक्षक चंद्रकांत गोसावी यांनी दिली. दरम्यान हा गोळीबार कोणत्या कारणामुळे करण्यात आला आहे. याचे कारण अद्याप समोर आले नसून पोलिसांकडून तपास सुरु आहे.