Nanded News : डीजे समोर नाचण्यास रोखणं जीवावर बेतलं; चिडलेल्या टोळक्याकडून तरुणाची निर्घृण हत्या

संतोष जोशी

Nanded Crime News : वलिमाच्या कार्यक्रमात डिजे समोर नाचण्यास रोखणं एका तरुणाच्या जीवावर बेतलं आहे. चिडलेल्या टोळक्याने एका तरुणाचा चाकूने भोसकून निर्घृणपणे हत्या केल्याची घटना घडली आहे. सोमवारी रात्री नांदेडमध्ये ही घटना घडली आहे. शेख मोईस असं हत्या झालेल्या तरुणाचं नाव आहे. (Latest Marathi News)

वलिमाच्या कार्यक्रमात डिजे समोर नाचण्यास रोखल्याने टोळक्याने शेख मोईस नावाच्या तरुणाची हत्या केल्याची घटना घडली आहे. या घटनेनंतर शेख मोईसच्या नातेवाईकांनी थेट विमानतळ पोलीस ठाण्यातच मृतदेह आणला. त्यामुळे परिसरात काही काळ तणावाचं वातावरण निर्माण झालं. पोलिसांनी आरोपींना अटक करण्याचे आश्वासन दिल्याने वातावरण निवळले. नांदेड (Nanded) शहरातील कर्मवीर नगर भागात शेख नदीम याचा वलिमाचा कार्यक्रम होता.

नेमकं काय घडलं ?

या कार्यक्रमाला नातेवाईक, गल्लीतील लोक आले होते. यावेळी सहा ते सात जणांचे टोळके दुचाकीवर आले. त्यांनी वलिमाच्या ठिकाणी सुरू असलेल्या डीजेच्या समोर नाचत धिंगाणा करण्यास सुरुवात केली. त्यामुळे शेख नदीमचा भाऊ शेख मोईस आणि मित्रांनी टोळक्याला डीजे समोर नाचण्यास रोखलं. त्यामुळे टोळक्याने वलिमाच्या ठिकाणी राडा घालत शेख मोईसच्या पोटात धारधार शस्त्राने वार केला. जखमी मोईसला जिल्हा शासकीय रुग्णालयात दाखल केले. मात्र, डॉक्टरांनी त्याला मृत घोषित केलं. या प्रकरणी शेख मोईसच्या वडिलांनी दिलेल्या तक्रारीवरून पोलीस ठाण्यात सात जणांविरोधात गुन्हा दाखल करण्यात आला आहे.