Farmer Sugarcane Loss : रिल्स बनवण्याच्या नादात शेतकऱ्याच्या कष्टाची राख, फटाक्यांमुळे लाखोंचा ऊस जळाला | VIDEO

साम टीव्ही प्रतिनिधी - संजय सुर्यवंशी

सोशल मीडियावर प्रसिद्धी मिळवण्यासाठी सध्या तरुणाईमध्ये रिल्स बनवण्याची क्रेझ वाढताना दिसत आहे. मात्र, काही सेकंदांच्या व्हिडीओसाठी केली जाणारी ही हुल्लडबाजी आता इतरांसाठी मोठे संकट ठरत आहे. दिवाळीच्या फटाक्यांसोबत रिल्स बनवण्याच्या नादात शेतकऱ्याच्या कष्टावर पाणी फेरले गेले आहे. रिलस्टारमुळे शेतकऱ्याचा लाखोंच्या ऊसाची राख झाल्याची माहिती समोर आली आहे. त्यामुळे ऐन दुष्काळात शेतकरी संकटात सापडला आहे.

फटाक्यांमुळे लाखोंच्या उसाची राख

सोशल मीडियावर रिल्स बनवण्याची क्रेझ सध्या तरुणाईच्या चांगलीच डोक्यात शिरली आहे. मात्र, हीच हौस आता अन्नदात्यासाठी जीवघेणी ठरली आहे. नांदेड तालुक्यातील (Nanded Farmer) मरळक येथे रिल्स काढण्यासाठी फोडलेल्या फटाक्यांमुळे कापणीला आलेला तब्बल 3 एकरावरील ऊस जळून खाक झाल्याचा संतापजनक प्रकार समोर आला आहे. या घटनेमुळे शेतकरी कुटुंब उघड्यावर आले असून, हुल्लडबाज रिल्स स्टार्सवर कडक कारवाईची मागणी संतप्त शेतकऱ्यांनी केली आहे.

मराठवाडा आधीच दुष्काळात होरपळून निघालाय. त्यात काही शेतकऱ्यांनी जीवाचं रान करून आपली शेती जगवली आहे. मात्र बेजबाबदारपणे फटाके फोडणाऱ्यांची हुल्लडबाजी बळीराजाच्या पिकांवर उठलीय आणि त्यातूनच या लाखोंच्या ऊसाची राख झालीय. सोशल मीडियावरील प्रसिद्धीसाठी आणि काही सेकंदांच्या रिल्ससाठी लोकांच्या जीवाशी आणि शेतकर्‍यांच्या कष्टाशी खेळणाऱ्या या विकृतीला चाप लावण्यासाठी पोलिसांनी कठोर कारवाई करण्याची गरज आहे.