Naigaon Crime : एटीएम फोडून ४ लाख ३० हजारांची रोकड लंपास; नायगावमधील घटना

महेंद्र वानखेडे

नायगाव : वसई- विरारच्या नायगाव पूर्वेच्या टीवरी राजावळी रस्त्यालगत असलेल्या ॲक्सिस बँकेचे एटीएम मशीन चोरट्यांनी फोडले आहे. बुधवारी पहाटे साडेतीनच्या सुमारास ही घटना घडली असून सकाळी हा प्रकार समोर आला. यात चोरट्यांनी एटीएममध्ये असलेली तब्बल ४ लाख ३० हजारांची रोकड लंपास केली आहे.

वसई- विरारच्या नायगाव (Naigaon) पूर्वेच्या टीवरी राजावळी रस्त्यालगत नवकार फेज थ्री इमारत आहे. या इमारतीत ॲक्सिस बँकेचे एटीएम आहे. वस्तीचा परिसर असताना देखील बुधवारी पहाटेच्या सुमारास चोरट्यांनी एटीएममध्ये प्रवेश करून गॅस कटरच्या सहाय्याने एटीएम मशीन फोडले. यानंतर यातील सर्व चार लाख २९ हजार ७०० इतकी रोकड काढून पसार झाले. एटीएम (ATM) फोडल्याचा हा प्रकार सकाळी काही नागरिकांच्या लक्षात आला. याबाबत पोलिसांना माहिती देण्यात आली.  

यानंतर नायगाव पोलिसांनी (Police) घटनास्थळी भेट देऊन पंचनामा केला आहे. एटीएम फोडताना त्या ठिकाणी दोन व्यक्ती असल्याचे समजले आहे. मात्र आणखीन त्याचे साथीदार सोबत असण्याची शक्यता आहे. त्याचा ही तपास सुरू असल्याची माहिती नायगाव पोलिसांनी दिली आहे. दरम्यान यापूर्वी सुद्धा वसई विरार मध्ये एटीएम फोडीच्या घटना घडल्या आहेत.