Sambhajinagar Accident : टेम्पोच्या धडकेत दुचाकीस्वार ठार, एकजण गंभीर जखमी

रामू ढाकणे 

छत्रपती संभाजीनगर : दुचाकीला समोरून येणाऱ्या टेम्पोने जोरदार धडक दिली- या अपघातात दुचाकीवरील एकाच जागीच मृत्यू झाला. तर दुसरा एकजण गंभीर जखमी झाला आहे. अपघातानंतर वाहन चालक घटनास्थळावरून फरार झाला आहे. तर जखमीला लागलीच उपचारासाठी रुग्णालयात दाखल करण्यात आले आहे. 

छत्रपती संभाजीनगर (Sambhajinagar) जिल्ह्यातील अडुळ येथे धुळे- सोलापूर राष्ट्रीय महामार्गावर हा अपघात झाला आहे. या अपघातात एका टेम्पोच्या धडकेत दुचाकीवर असणाऱ्या एका जणांचा जागीच मृत्यू झाला. तर इतर एक जण हा गंभीर जखमी झाला आहे. दुचाकीवरील दोघे जण आडूळ शिवारातील एका हॉटेलवर चहा घेऊन परत येत होते. मात्र रस्ता ओलांडताना पाचोडकडून भरधाव वेगात आलेल्या एका टेंपोने दुचाकीला जोराची (Accident) धडक दिली. यात अवधूत माणिकराव वाघ (वय ४३) या व्यक्तीचा मृत्यू झाला. तर त्याच्यासोबत असणारा सहकारी हा गंभीर जखमी झाला आहे. 

अपघात घडल्यानंतर परिसरातील नागरिक घटनास्थळी जमा झाले. घटनेतील जखमीला लागलीच रुग्णालयात उपचारासाठी हलवण्यात आले. तर घटनेची माहिती पोलिसांना दिल्यानंतर पोलिसांनी घटनास्थळी येत पंचनामा केला. मात्र हा अपघात झाल्यानंतर टेम्पो चालक हा वाहन घेऊन पसार झाला आहे. त्याचा शोध पोलीस घेत आहेत.