Shocking News: धर्मगुरूला भेटायला गेली, परत आलीच नाही; नागपूरमधील महिला बॉर्डर क्रॉस करून गेली पाकिस्तानात

नागपूरची एक महिला काश्मीरच्या कारगिलमधील बॉर्डरवरून बेपत्ता झाल्याची बातमी समोर आली आहे. सुनीता (४३ वर्षे ) असं या बेपत्ता झालेल्या महिलेचे नाव आहे. ही महिला धर्मगुरूला भेटण्यासाठी गेली होती. या महिलेने बॉर्डर ओलांडून पाकिस्तानात प्रवेश केला. त्यामुळे भारतीय सुरक्षा यंत्रणा आणि गुप्तचर संस्था गोंधळात पडल्या आहेत. या महिलेने बुधवारी बॉर्डर ओलांडली आणि लडाखच्या कारगिल जिल्ह्यातील शेवटच्या गावातून पाकिस्तानमध्ये प्रवेश केला असल्याचे सांगितले जात आहे.

नागपूरमधील सुनीताने पीओके बॉर्डर पार केली असून तिला पाकिस्तानी सैन्याने ताब्यात घेतल्याचा गुप्तचर आणि सुरक्षा यंत्रणेला संशय आहे. सुनीता ही नागपूरच्या कपिलनगर पोलिस ठाण्याच्या हद्दीतील संत कबिरनगरमध्ये राहते. आधी ती एका रुग्णालयात नर्स म्हणून काम करायची. पाकिस्तानमधील एका धर्मगुरुसोबत तिची ऑनलाइन ओळख झाल्याची माहिती देखील समोर आली आहे.

धर्मगुरूशी ऑनलाईन ओळख झाल्यानंतर सुनीताने त्या धर्मगुरूला भेटण्याचे प्रयत्न सुरू केले. अमृतसरच्या अट्टारी चेकपोस्टमधून पाकिस्तानला जाण्याचा तिने यापूर्वी दोनदा प्रयत्न केला. मात्र भारतीय सुरक्षा यंत्रणेने तिला परत पाठवले होते. १४ मे रोजी सुनीता तिच्या १२ वर्षीय मुलासोबत काश्मीरला गेली.

कारगिल बॉर्डरवरील शेवटचे गाव 'हुंदरमान' मध्ये ती होती. तिथे मुलाला ठेऊन मी परत येते असं सांगून निघून गेली. जेंव्हा सुनीता परत आली नाही तेंव्हा स्थानिकांनी १२ वर्षीय मुलाला लडाख पोलिसांच्या ताब्यात दिले. सुनीताची मानसिक स्थिती सामान्य नसून नागपूरच्या शासकीय मनोरुग्ण रुग्णालयात तिचे उपचार सुरू असल्याची माहिती सांगितली जात आहे.

मुलाला कपडे घेऊन देतो म्हणून सुनीता घरातून बाहेर गेल्याचे सुनीताची आई निर्मला जामगडे यांनी सांगितले. १२ वर्षीय नातू हा काश्मीर मध्ये पोलिस ठाण्यात असून सुनीता बाबत स्थानिक कपिलनगर पोलिसांकडून विचारणा करण्यात आल्याचे तिच्या आईने सांगितले. सुनीता धर्मगुरूला भेटण्यासाठी बॉर्डर क्रॉस करून पाकिस्तानात गेली असल्याचा अंदाज व्यक्त केला जात आहे.