Nagpur : शेतात कामाला जाताना कारने चिरडले, २ महिलांचा जागीच मृत्यू

पराग ढोबळे, नागपूर प्रतिनिधी, साम टीव्ही मराठी

शेतामध्ये कामाला निघालेल्या दोन महिलांचा अपघाती मृत्यू झाल्याची घटना नागपूरमध्ये घडली आहे. रामटेकजवळ एका भरधाव कारने दोन महिलांना उडवले. कारचा वेग अतिशय जोरात होता, त्यामुळे महिलांना जबर मार लागला अन् रूग्णालयात नेण्याआधीच त्यांचा मृत्यू झाला. अपघातानंतर स्थानिकांचा उद्रेक झाला. संतापलेल्या लोकांनी कार पेटवून देण्याचा प्रयत्न केला. पोलिसांकडून अपघाताची नोंद केली. अपघातग्रस्त वाहन पोलिसांनी ताब्यात घेतले आहे.

नागपूरमधील रामटेकजवळील कांद्री माईन परिसरात भरधाव कारच्या धडकेत दोन शेतमजूर महिलांचा जागीच मृत्यू झाला. मंदा उपासे (49) आणि प्रमिला शेंद्रे (41) अशी मृतक महिलांची नावे आहेत. दोन्ही महिला पायी शेतात कामावर जात होत्या. त्याचवेळी अचानक भरधाव वेगात असलेल्या कारने जोरदार धडक दिल्यानं मृत्यू झाला. अपघातानंतर चालकाने आणि कारमधील लोकांनी कार तिथेच सोडून पळ काढला. पोलिसांकडून सीसीटीव्ही तपास करत ३ जणांना ताब्यात घेतले आहे.

कार अपघातानंतर परिसरात तणावाची स्थिती निर्माण झाली. संतप्त नागरिकांनी कारला आग लावण्याचा प्रयत्नही केला. पण काही स्थानिकांनी आग विझवली अन् पोलिसांना सूचना दिली. कारमधील कुणाल अहुजा, प्रशांत निसवानी आणि चालक सागर ठाकूर अपघातानंतर कार टोलजवळ सोडून पळाले होते. पोलिसांनी तिघांनाही ताब्यात घेतले आहे. आंदोलकांनी दुभाजक काढल्यामुळे वाढलेले अपघात, पथदिव्यांचा अभाव यांसह सुरक्षेच्या मुद्यांवर नाराजी व्यक्त केली. रामटेक SDPO रमेश बरकते यांनी टीमसह घटनास्थळी धाव घेत परिस्थिती हाताळली..