Anganwadi : नागपुरात पहिली AI आधारित अंगणवाडी; व्हर्च्युअल रिअ‍ॅलिटी सेट्सच्या माध्यमातून शिक्षण

पराग ढोबळे 

नागपूर : नागपूर जिल्ह्यातील वडधामना गाव देशातील एक नवा आदर्श निर्माण करत आहे. कारण, या गावात देशातील पहिली "AI आधारित अंगणवाडी" सुरु करण्यात आली आहे. नागपूर जिल्हा परिषदेचे सीईओ यांच्या संकल्पनेतून गरीब मुलांनाही चांगल शिक्षण मिळावं यासाठी उपक्रम राबवला जात असून बाल भरारी मिशन अंतर्गत अंगणवाडी कात टाकत आहे. 

आजच्या डिजिटल युगात शिक्षणाचे स्वरूप देखील झपाट्याने बदलत आहे. आता तो बदल अंगणवाड्यांपर्यंत पोहोचला आहे. यात नागपूर जिल्ह्यातील वडधामना इथल्या अंगणवाडीत ३ ते ६ वयोगटातील लहान मुलांना कृत्रिम बुद्धिमत्ता आणि व्हर्च्युअल रिअ‍ॅलिटी सेट्सच्या माध्यमातून शिक्षण दिलं जात आहे. VR सेट वापरून मुलांना खेळत- खेळत, प्रत्यक्ष अनुभवा सारखं शिक्षण मिळत आहे. सध्या २५ मुलं या तंत्रज्ञानाचा लाभ घेत आहेत.

पोषणात्मक डेटाही डिजिटल स्वरूपात 
अंगणवाडीत येणाऱ्या मुलांना व्हर्च्युअल रिअ‍ॅलिटी सेट्सच्या माध्यमातून शिक्षण देण्यासोबत अंगणवाडीत गर्भवती महिलांचा वैद्यकीय व पौषणात्मक डेटा देखील डिजिटल स्वरूपात संकलित केला जातो. यामुळे आईपासून लेकरापर्यंतच्या आरोग्य आणि विकासावर बारकाईने लक्ष ठेवता येणार आहे. अर्थात वडधामना येथील हि अंगणवाडी एक वेगळा आदर्श निर्माण करत आहे. 

 जिल्ह्यातील ४० अंगणवाड्या AI होणार 

पुढच्या टप्प्यात नागपूर जिल्ह्यात एकूण ४० AI अंगणवाड्या सुरु होणार आहेत. ग्रामीण भागातीलही मुलांना आधुनिक शिक्षण आणि डिजिटल साधनांची संधी मिळावी. या AI अंगणवाडीच्या माध्यमातून मुलांचं सर्वांगीण विकास मॉनिटर करता येणार आहे आणि त्यांना तंत्रज्ञानाशी लवकर जोडता येणार आहे. हे मॉडेल संपूर्ण देशासाठी एक प्रेरणा ठरणार आहे.