Nagpur News: मोबाईल खेळण्याच्या नादात १२ वर्षीय मुलाचा मृत्यू; नागपूरमधील धक्कादायक घटना

संजय डाफ

Nagpur News: नागपूर येथून एक हृदयद्रवक घटना समोर येत आहे. मोबाईल ऍपमध्ये दाखवल्यानुसार वागताना एका १२ वर्षीय मुलाला गळफास लागला आहे. यात या मुलाचा दुर्देवी मृत्यू झाला आहे. सोमवारी नागपूरच्या क्वार्टर परिसरात ही घटना घडली. या घटनेमुळे परिसरात हळहळ व्यक्त केली जात आहे.(Latest Nagpur News)

अग्रण्य सचिन बारापात्रे असं १२ वर्षीय दगावलेल्या मुलाचं नाव आहे. त्याचे वडील इलेक्टिकचे काम करतात. क्वार्टर परिसरात हा चिमुकला राहत होता. इथेच समोर त्याचे नातेवाईक चिखले राहत होते. अग्रण्य रोज त्यांच्या घरी खेळण्यासाठी जात होता. मात्र सोमवारी तो खेळण्यासाठी गेला आणि परत आलाच नाही.

अग्रण्य छतावर जाऊन खेळत होता. बराच वेळ झाला तो घरी आला नाही म्हणून त्याची आई त्याला बोलवण्यासाठी चिखले यांच्या घरी गेली. त्यावेळी तो कुठे दिसला नाही त्यामुळे शोधाशोध सुरू झाली. यावेळी नायलॉनच्या ओढणीने गळफास घेतलेल्या स्थितीत तो आढळला.

मुलाला अशापद्धतीने पाहून आईच्या पायाखालची जमीनच सरकली. त्याला तात्काळ तेथून खाली घेण्यात आले आणि जवळच्या रुग्णालयात दाखल केले. मात्र डॉक्टरांनी त्याला तपासल्यावर मृत घोषित केलं. या घटनेत प्राथमिक माहितीनुसार, मोबाई फोनवर खेळताना त्यात दाखवल्याप्रमाणे करण्याचा प्रयत्न करताना अग्रण्यला गळफास लागल्याचे समजले आहे.