'अनैतिक संबध असले तरी आत्महत्येस प्रवृत्त करण्याचा गुन्हा लागू होत नाही', हायकोर्टाचा निर्णय

गोंदिया जिल्ह्यातील एका प्रकरणात मुंबई उच्च न्यायालयाच्या नागपूर खंडपीठानं महत्वाचा निकाल दिला आहे. 'केवळ आत्महत्या केलेल्या महिलेसोबत अनैतिक संबंध होते, म्हणून संबंधित पुरूषाविरूद्ध आत्महत्येस प्रवृत्त करण्याच्या गुन्ह्या अंतर्गत कारवाई केली जाऊ शकत नाही', असे स्पष्ट करत हायकोर्टानं या प्रकरणातील आरोपीविरूद्ध दाखल एफआयआर रद्द केला आहे.

ही भयंकर घटना ९ डिसेंबर २०२१ रोजी घडली होती. सालकेसा पोलीस ठाण्यात वाहनचालक म्हणून कार्यरत असलेल्या प्रवीण बोरकर याचे सहकारी महिलेसोबत अनैतिक संबंध असल्याचा आरोप करण्यात आला होता. संबंधित महिलेनं गळफास घेऊन आत्महत्या केली होती. त्यानंतर प्रवीण बोरकरांवर संशयाची सुई फिरली. बोरकरविरोधात आत्महत्येस प्रवृत्त केल्याचा गुन्हा दाखल करण्यात आला होता.

मात्र, या प्रकरणात बोरकर यानं हायकोर्टात याचिका दाखल केली होती. दरम्यान, सुनावणी पार पडली. सुनावणीत हायकोर्टानं स्पष्ट केलं की, 'बोरकर आणि मृत महिलेचे अनैतिक संबंध होते. याचे कोणतेही ठोस पुरावे नाहीत. तसेच अनैतिक संबंध असले तरी, बोरकर यानं मृत महिलेपुढे आत्महत्या करण्याशिवाय दुसरा कोणताच पर्याय ठेवला नाही, असा कोणताही पुरावा रेकॉर्डवर नाही'.

असं हायकोर्टानं या प्रकरणात स्पष्ट केलं. यामुळे या गुन्ह्यातील आरोपी प्रवीण बोरकरविरूद्ध दाखल करण्यात आलेला एफआयआर रद्द करण्यात आला आहे. कोर्टानं दिलेल्या निकालानंतर बोरकर यांना दिलासा मिळाला आहे.