पप्पा आपल्याला नेणार! बदलीच्या ठिकाणी जाण्यास पत्नी उत्साही; नियतीचा घाला अन् माय-लेकीचा चटका लावणारा अंत

जालना : राज्यात दिवसेंदिवस गुन्हेगारीचं प्रमाण वाढत चाललं आहे. या अपघातांमध्ये अनेकजणांचे प्राण देखील जातात. असाच एक भीषण अपघात जालन्यात झाला आहे. भरधाव ट्रकच्या धडकेत एका महिलेसह तिच्या लहान मुलीचा दुर्दैवी मृत्यू झाला आहे. या अपघातात महिलेचा पती आणि लहान मुलीला किरकोळ दुखापत झाली आहे. परी विश्वकांत शिंदे (वय ४) आणि शीला विश्वकांत शिंदे (३४) अशी मृतांची नावं आहेत. शीला शिंदे यांचे पती बिकानेरला नोकरीला आहेत. ते महिन्याभराची सुट्टी काढून कुटुंबाला भेटण्यासाठी आले होते. सुट्टी संपल्यावर ते शीला आणि दोन्ही लेकींना घेऊन बिकानेरला जाणार होते. कारण तिथेच त्यांची बदली झाली होती. पतीसोबत राहायला मिळणार असल्यानं शीला आनंदात होत्या. पण नियतीच्या मनात काही औरंच होतं. बिकानेरला जाण्यापूर्वीच त्यांचा अपघाती मृत्यू झाला. त्यांच्यासोबत त्यांची लेक परीही अपघातात मृत्यूमूखी पडली.

अंबड तालुक्यातील गोंदी येथील रहिवासी विश्वकांत शिंदे हे गोंडीवरून त्यांचे मोठे भाऊ निशिकांत शिंदे यांना भेटण्यासाठी निघाले होते. निशिकांत शिंदे छत्रपती संभाजीनगर येथे राहतात. उशीर झाल्याने आज आपण संभाजीनगरला भावाकडे जाणार आहोत, असं त्यांनी बायकोला सांगितलं. छत्रपती संभाजीनगर येथे भावाच्या घरी ते मुक्काम करणार होते. विश्वकांत शिंदे वर्ल्ड पीस आर्मीमध्ये कार्यरत असल्याने त्यांना नेहमी बाहेरच राहावं लागतं. त्यांच्या बदल्या राज्यभर होत असतात. त्यामुळे ते परिवारापासून अनेक महिने दूरच असतात. आपल्या परिवारासोबत वेळ घालावा यासाठी त्यांनी एक महिन्याची सुट्टी घेतली होती.

विश्वकांत शिंदे २९ जूनला पुन्हा बिकानेरमध्ये सेवेसाठी रुजू होणार होते. मात्र, यावेळेस जाताना ते संभाजीनगरला भावाकडे काही दिवस राहणार होते. तसेच यावेळी बिकानेरला ड्युटी जॉईन करताना आपल्या दोन मुली आणि बायकोला सोबत नेणार होते. त्यामुळे बायकोचा आनंदही गगनात मावेनासा झाला होता . नवरा आपल्याला सोबत घेऊन जाणार असल्याने शीला आनंदात होत्या. त्यामुळे त्यांनी घरूनच संभाजीनगरमध्ये काही कपडे, लहान पुलाची शॉपिंग करण्याचा बेत आखला होता. मात्र नियतीच्या मनात काही वेगळंच होते.