Tulja Bhavani Temple : तुळजाभवानीची गायब तलवार सापडली; महिनाभरापासून गायब होती तलवार, वाचा स्पेशल रिपोर्ट

महाराष्ट्राची कुलदैवता असलेल्या तुळजाभवानी मंदिरातील एका तलवारीमुळे पुजारी आणि मंदीर संस्थान पुन्हा आमने-सामने आलेत. मंदिरातून देवीचीच तलवार गायब झाल्यानं वादाची धार वाढतच गेली. मंदिराच्या जीर्णोद्धराचं काम सुरु असताना काशी येथील गणेश्वर द्रविड शास्त्री यांच्या उपस्थितीत पुजा झाली होती. त्यावेळी देवीच्या अष्ट आयुधांतील तलवार संस्थानानं गायब केल्याचा आरोप पुजारी मंडळाने केलाय. त्यावरुन पुजारी मंडळानं आंदोलनही केलं.

दुसरीकडे अभ्यासकांनीही ही तलवार महत्वाची असून संस्थानने माहिती दडवल्याचा आरोप केलाय. तर ही तलवार भाविकांच्या दर्शनासाठी ठेवली पाहिजे अशी मागणी भाविकांनी केलीय.

तलवारीवरुन वाद पेटल्यानंतर मंदिर संस्थानने प्रसिद्धीपत्रक काढून तलवार महंत वाकोजीबुवा यांच्या मठात असल्याचे जाहीर केलंय. दैनंदिन पूजेसाठी तलवार मठात ठेवल्याचं स्पष्टीकरण दिलंय. तुळजाभवानी मंदिराच्या 1865 कोटींच्या विकास आराखड्याला मंजुरी मिळाली आहे.

जीर्णोद्धाराची कामंही सुरू आहेत. मात्र तुळजापूर मंदिरातील वाद काही संपत नाही. यापूर्वीही 2023 मध्ये तुळजाभवानीच्या पुरातन दागदागिने चोरी प्रकरणी महंतांसह सात जणांवर गुन्हा दाखल झाला होता. त्यामुळे कधी दागिने चोरी, कधी ढिसाळ व्यवस्थापन ,कधी बनावट दर्शन पास तर कधी पुजा-यांची मुजोरी यांच्यामुळे मंदिरातला कारभार कायम विवादात राहिला आहे. तलावारीच्या वादामुळे यात नवीन भर पडली आहे इतकंच...