धक्कादायक! दूध आटवताना झालं रबर; गरम केल्यानंतर 25 लिटर दुधाचा झाला घट्ट गोळा

हा प्रकार पाहिल्यावर तुम्हाला वाटेल काहीतरी नावीण्यपूर्ण पदार्थ गावकरी बनवतायेत. पण नाही...हे दूध आहे. तुम्हाला धक्का बसला असेल. पण हे खरं आहे. दूध आटवल्यानंतर त्याचं चक्क रबर बनलं आहे. राज्यभरात अन्न व औषध प्रशासनाने दूध, पनीर आणि अन्न पदार्थांविरोधातल्या भेसळीविरोधात कारवाई बडगा उगारला आहे. त्यामुळे गावापासून ते शहरापर्यंतच्या भेसळखोरांचे धाबे दणाणले आहे.

मात्र अशा स्थितीतच मालेगाव तालुक्यातल्या रावळगावमध्ये हा धक्कादायक प्रकार समोर आलाय. त्याचं झालं असं..रावळगाव येथील ओंकार नगर येथे श्री शिव गणेश नवरात्रोत्सव मंडळाचे सदस्य कोजागिरी पौर्णिमेनिमित्ताने मोठ्या उत्साहात एकत्र आले होेते. त्यासाठी त्यांनी 25 लिटर दूध आणले होते. चुलीवर दूध आटवत असताना मात्र त्याचं काय झालं ते तुम्ही पहाताय...दूध चक्क रबर किंवा चिंगमसारखे ताणले जाऊ लागल्याने गावकऱ्यांना धक्का बसला.

दुधाचा घट्ट गोळा तयार झाल्याने दुधाच्या गुणवत्तेबाबत संशय व्यक्त केला जात आहे. संबंधित दूध विक्रेत्याला बोलावूनही तो समोर आला नसल्याची तक्रार आहे. ग्रामीण भागात अजूनही दूधात भेसळ होत असल्याचं वास्तव आहे. जुलै महिन्यात जळगाव जिल्ह्यातील चोपडा येथे माजी सैनिकाला असाच अनुभव आला होता. खाजगी दूध डेअरीमधून आणलेले दूध घरी तापवल्यावर त्याचं रबर झालं होतं. या प्रकाराची तक्रार एफडीएकडे करण्यात आली होती. आता मालेगावातील प्रकार समोर आल्यानंतर नागरीकांचे आरोग्य धोक्यात आणणाऱ्या भेसळखोरांना बेड्या ठोकल्याशिवाय चित्र पालटणार नाही, असा सुर सर्वत्र उमटतोय.