Nagpur Zoo Shocking : १८ फुटांची लोखंडी जाळी ओलांडून वाघाच्या पिंजऱ्यात शिरला तरुण, पुढे जे घडलं ते भयंकरच...

नागपूरच्या महाराजबाग प्राणीसंग्रहालयात आज सकाळी एक धक्कादायक घटना घडली. एका मनोरुग्णाने थेट वाघाच्या पिंजऱ्यात प्रवेश केल्यामुळे काही काळ गोंधळाचे वातावरण निर्माण झाले. पिंजऱ्याभोवती असलेल्या तब्बल १८ फूट उंच लोखंडी जाळी ओलांडून हा मनोरुग्ण आत शिरला त्यावेळेस या पिंजऱ्यात दोन वाघ होते. सुदैवाने या घटनेत कोणतीही जीवितहानी झाली नाही.

मिळालेल्या माहितीनुसार नागपूरच्या महाराजबाग प्राणीसंग्रहालयात सुरक्षारक्षक येण्याजाण्यासाठी जो गेट वापरतात, त्याच मार्गाने एक मनोरुग्ण आत शिरला. या पिंजऱ्याच्या आत आणखी एक गेट होता. जो वाघाला मोकळे सोडण्यासाठी वापरला जातो. वाघांच्या पिंजऱ्याभोवती १८ फूट उंच लोखंडी असलेली जाळी ओलांडून हा मनोरुग्ण वाघांच्या पिंजऱ्यात शिरला. त्यावेळी पिंजऱ्यात दोन वाघ होते. परंतु त्या क्षणी वाघ पिंजऱ्याच्या एका बाजूला बंद असलेल्या भागात असल्याने मोठी दुर्घटना टळली.

सुरक्षारक्षकांनी ही बाब वेळीच लक्षात घेतली आणि त्वरीत कारवाई करत या व्यक्तीला सुरक्षितपणे बाहेर काढले. ही घटना सीताबर्डी पोलीस ठाण्याच्या हद्दीत घडली असून पोलिसांनी संबंधित व्यक्तीला ताब्यात घेतले आहे. प्राथमिक तपासात या व्यक्तीवर मानसिक आजार असल्याचे आढळून आले आहे.

वाघांच्या पिंजऱ्याभोवती १८ फूट उंच लोखंडी जाळी असूनही तो आत कसा गेला, याची चौकशी सध्या सुरू आहे. प्राणीसंग्रहालय प्रशासन आणि पोलिसांकडून याप्रकरणी सखोल तपास केला जात असून सुरक्षेच्या उपाययोजनांवरही नव्याने विचार केला जात आहे. ही घटना सिस्टीममधील सुरक्षेच्या त्रुटी दर्शवते की नाही, याबाबतही विचारमंथन सुरू असून भविष्यात अशा घटना टाळण्यासाठी अतिरिक्त सुरक्षा यंत्रणा बसवण्याचा विचार सुरू आहे.