Maval : मावळातील वनक्षेत्रात होणार देशी वृक्ष लागवड; अभिनेते सयाजी शिंदे यांच्या पुढाकारातून उपक्रम

मावळ : प्रसिद्ध अभिनेते आणि सह्याद्री देवराईचे संस्थापक सयाजी शिंदे यांच्या पुढाकारातून मावळ तालुक्यात जैवविविधतेसाठी देशी वृक्षलागवडीचा उपक्रम राबवण्यात येणार आहे. या उपक्रमातून तालुक्यातील असलेल्या वनक्षेत्रात विविध प्रजातींच्या देशी वृक्षाची लागवड करण्यात येणार आहे. याची सुरवात लवकरच करण्यात येणार असल्याचे आजच्या बैठकीत ठरविण्यात आले असून उपक्रमाचा शुभारंभ करण्यात आला. 

अभिनेते सयाजी शिंदे यांच्या पुढाकारातून राबविण्यात येत असलेल्या या उपक्रमाच्या तयारीसाठी आमदार सुनील शेळके यांच्या निवासस्थानी विशेष बैठक घेण्यात आली. या बैठकीला सयाजी शिंदे यांच्यासह मावळ तालुक्यातील विविध सामाजिक संस्थांचे प्रतिनिधी उपस्थित होते. सदरचा उपक्रम पावसाळ्याच्या अनुषंगाने राबविण्यात येत आहे. 

वन्यजीवांचे संवर्धनास हातभार

पावसाळा सुरू होण्याच्या पार्श्वभूमीवर ही वेळ वृक्षारोपणासाठी अतिशय अनुकूल मानली जाते. मावळात नैसर्गिक पाणी अधिक उपलब्ध असल्याने नवीन रोपे लवकर रुजतात आणि परिसरातील वनस्पती व प्राण्यांची जैवविविधता वाढीस लागते. यामुळे ऑक्सिजन निर्मितीत वाढ होईल आणि वन्यजीवांचे संवर्धन होण्यास हातभार लागेल. या उपक्रमातून पर्यावरण रक्षण, हरित महाराष्ट्र आणि शाश्वत विकास होणार आहे. 

वृक्षारोपणाला सुरवात 

दरम्यान मावळ तालुक्यातील सोमटणे, गहुंजे, इंदोरी, टाकवे बुद्रुक आणि अन्य वनक्षेत्रांमध्ये सह्याद्री देवराईच्या सहकार्याने स्थानिक देशी वृक्षांची लागवड करण्याचा निर्णय बैठकीत घेण्यात आला. त्यानुसार याची सुरवात देखील करण्यात आली आहे. यावेळी मावळचे आमदार सुनील शेळके यांच्या हस्ते वृक्षारोपण करून सयाजी शिंदे या झाडाला पाणी टाकून सुरुवात केली.