Manoj Jarange : हत्येचं षडयंत्र कुणी रचलं? मनोज जरांगेंनी केला गंभीर आरोप

मराठा आंदोलक मनोज जरांगे यांच्या हत्येच्या कट प्रकरणात पोलिसांनी कारवाईचा धडाका लावला आहे. पोलिसांनी आतापर्यंत दोघांना अटक केली आहे. मनोज जरांगे यांच्या हत्येचा कट कुणी रचला, याचा शोध पोलिसांकडून केला जात आहे. आता प्रकरणात जरांगेंनी गंभीर आरोप केला आहे. एका नीच वृत्तीने हा कट रचल्याचा आरोप मनोज जरांगे पाटील यांनी केलाय.

पोलिसांच्या कारवाईनंतर मराठा आंदोलक मनोज जरांगे पाटील यांनी माध्यमांशी संवाद साधला. मनोज जरांगे म्हणाले, 'या प्रकरणात काय गंभीर खुलासे झाले, मला माहीत नाही. तो तपास आणि चौकशीचा भाग आहे. जालना जिल्ह्याचे आमचे एसपी साहेब यात लक्ष घालून आहे. ते खोलापर्यंत जाणार आहे'.

'मला धमकी देणारा जन्माला येऊ शकत नाही. पण हे सत्य आहे की, खूप मोठा षड्यंत्र रचलं गेलं. एका नीच वृत्तीने हा कट रचलाय. तू जरी नेता असशील, तर चुकीच्या ठिकाणी हात टाकला आहे. घटना खूप गंभीर आहे, करणारा पेक्षा करून घेणारा करून घेणाऱ्यांनी खूप चुकीचं पाऊल उचललं आहे. खूप चुकीच्या ठिकाणी हात घातला आहे, असे ते म्हणाले.

'माझं समाजाला आवाहन आहे की, तुम्ही शांत राहावं. कट करणाऱ्या नेत्याला एक लक्षात ठेव म्हणावं, तू येथून पाठीमागे काय केले, कुणाला कळालं नाही. तुझ्या आयुष्यातली पहिली वेळ असेल की, तू करायचा अगोदर तुझ्या आठवणीला आम्ही भेदलं आहे. याचा अर्थ तू समजून घे, आमचेही हात खूप लांब आहे. आम्ही कच्चे नाही, असेही ते पुढे म्हणाले.