Maharashtra Politics: महायुती आणि मविआची रणनीती काय? पालिका निवडणुका स्वबळावर की युतीत?

स्थानिक स्वराज्य संस्थांच्या निवडणुका जिंकण्यासाठी सर्वच पक्षांनी मोर्चेबांधणीला सुरुवात केलीय.. मात्र लोकसभा आणि विधानसभेत एकत्रित लढलेल्या महायुती आणि महाविकास आघाडीनेही स्वबळाची चाचपणी सुरु केलीय..एवढंच नाही तर शिंदेसेनेनं भाजप आणि अजित पवारांच्या राष्ट्रवादीच्या नेत्यांना गळाला लावून फिल्डिंग लावलीय..शिंदे सेनेनं सिंधुदूर्गात राणेंचे विरोधक राजन तेलींना प्रवेश देत भाजपला अस्थिर करण्याची रणनीती आखलीय..

गेल्या काही दिवसांपासून भाजपचे मंत्री गणेश नाईक आणि एकनाथ शिंदेंमध्ये दरी वाढत चालली आहे. नवी मुंबईत शिंदेंनी नाईक समर्थकांना गळाला लावल्याने गणेश नाईकही शिंदेसेनेविरोधात आक्रमक झालेत..यावेळी नाईकांनी थेट स्वबळाचा नारा दिलाय.. स्थानिक स्वराज्य संस्थांच्या निवडणुकीआधी शिंदेसेनेने आक्रमक रणनीती अवलंबली असताना अजित पवारांच्या राष्ट्रवादीनेही आपली भूमिका स्पष्ट केलीय.. तर महाविकास आघाडीबाबत ठाकरे सेनेने मात्र सावध भूमिका घेतलीय..

खरंतर राज्यात 3 वर्षांपासून स्थानिक स्वराज्य संस्थांच्या निवडणुका झाल्या नाहीत..

आता 34 जिल्हा परिषदा, 336 पंचायत समित्या, 125 नगरपंचायती, 232 नगरपरिषदा आणि 29 महापालिकांच्या निवडणुकीचं बिगूल वाजणार आहे.. त्यामुळे लोकसभा आणि विधानसभेला एकत्र लढणारे सर्वच पक्ष आता स्थानिक स्वराज्य संस्थांच्या निवडणुकीत स्वबळाची चाचपणी करत आहेत..मात्र स्थानिक स्वराज्य संस्थांमधून विधानपरिषदेसाठी निवडून जाणाऱ्या २२ आमदारांचं गणित लक्षात घेता महायुती आणि महाविकास आघाडी स्वतंत्र नशीब आजमावणार की एकीची वज्रमूठ आवळून संख्याबळ वाढवणार? याकडे राज्याचं लक्ष लागलंय..