Weather Update : राज्यात विजांच्या कडकडाटासह पाऊस, 'या' जिल्ह्यांना सतर्कतेचा इशारा

राज्यातील बहुतांश भागांत उन्हाचा कडाका आणि उकाडा कायम असतानाच वातावरणात बदल होण्याची चिन्हे दिसू लागली आहेत. काही ठिकाणी पावसासाठी अनुकूल परिस्थिती निर्माण होत असून, कोकण आणि दक्षिण मध्य महाराष्ट्रातील काही जिल्ह्यांमध्ये विजांच्या कडकडाटासह पाऊस पडण्याची शक्यता वर्तवण्यात आली आहे. दरम्यान, उत्तर कोकणातील काही जिल्ह्यांना उष्ण आणि दमट हवामानाचा सामना करावा लागणार असल्याने हवामान विभागाने नागरिकांना सतर्क राहण्याचे आवाहन केले आहे.

आज पालघर, ठाणे, मुंबई आणि रायगड या जिल्ह्यांमध्ये हवेत आर्द्रतेचे प्रमाण वाढण्यासोबतच उष्णतेचा त्रास जाणवण्याची शक्यता आहे. तापमानातील वाढ आणि दमट वातावरणामुळे नागरिकांना अस्वस्थता जाणवू शकते. या पार्श्वभूमीवर संबंधित जिल्ह्यांसाठी हवामान विभागाकडून येलो अलर्ट जारी करण्यात आला आहे. त्यामुळे नागरिकांनी बाहेर पडताना आवश्यक ती खबरदारी घेणे महत्त्वाचे ठरणार आहे.

दुसरीकडे, दक्षिण कोकणातील रत्नागिरी आणि सिंधुदुर्ग जिल्ह्यांसह दक्षिण मध्य महाराष्ट्रातील कोल्हापूर जिल्ह्यात काही ठिकाणी वादळी वाऱ्यांसह पावसाच्या सरी कोसळण्याचा अंदाज आहे. राज्याच्या उर्वरित भागांमध्ये मात्र ढगाळ वातावरण राहण्याची शक्यता असली, तरी उन्हाची तीव्रता पूर्णपणे कमी होण्याची चिन्हे नाहीत. दिवसभर उष्णता आणि दमटपणा जाणवत राहण्याचा अंदाज आहे. दरम्यान, उन्हाचा तडाखा आणि संभाव्य पाऊस अशा दुहेरी हवामानाचा अनुभव सध्या राज्यातील विविध भागांत येत आहे.

राज्यात शुक्रवारपासून हवामान कोरडे

महाराष्ट्रातील कोकण आणि मध्य महाराष्ट्रातील काही भागांत शुक्रवारपर्यंत हलक्या पावसाची शक्यता हवामान विभागाने व्यक्त केली आहे. कोकण किनारपट्टीवर काही ठिकाणी उष्णतेसह दमट वातावरण जाणवू शकते. शुक्रवारपासून राज्यातील बहुतांश भागांत हवामान कोरडे राहण्याचा अंदाज आहे. दरम्यान, कोकण-गोव्यात कमाल तापमानात वाढ नोंदवण्यात आली आहे. विदर्भासह इतर काही भागांत किमान तापमानही सरासरीपेक्षा अधिक राहिले. बुधवारी सोलापूर येथे राज्यातील सर्वाधिक ३७.३ अंश सेल्सिअस तापमानाची नोंद झाली, तर महाबळेश्वर येथे किमान तापमान १८.४ अंश सेल्सिअस होते. पुणे परिसरात आकाश निरभ्र राहण्याची शक्यता आहे.