Scholarship Exam: विद्यार्थ्यांसाठी महत्वाची बातमी! शिष्यवृत्ती परीक्षेच्या तारखेत बदल, 'या' दिवशी होणार पेपर

Summary -

• शाळकरी विद्यार्थ्यांसाठी महत्वाची बातमी

• शिष्यवृत्ती परीक्षा २२ फेब्रुवारी २०२६ रोजी होणार आहे

• इयत्ता ५ वी आणि ८ वी विद्यार्थ्यांची होते शिष्यवृत्ती परीक्षा

शिष्यवृत्ती परीक्षेसाठी तयारी करणाऱ्या विद्यार्थ्यांसाठी महत्वाची बातमी आहे. शिष्यवृत्ती परीक्षेच्या तारखेमध्ये बदल करण्यात आला आहे. शिष्यवृत्ती परीक्षा पुढील वर्षी फेब्रुवारी महिन्यात घेण्यात येणार आहे. या परीक्षेसाठी आता काही दोन महिने शिल्लक राहिले आहेत. त्यामुळे विद्यार्थ्यांनी परीक्षेच्या तयारील लागावे.

महाराष्ट्र राज्य परीक्षा परिषदेमार्फत घेण्यात येणाऱ्या प्राथमिक (इयत्ता ५ वी) आणि माध्यमिक (इयत्ता ८ वी) शिष्यवृत्ती परीक्षेच्या तारखेत बदल करण्यात आला असून आता ही परीक्षा २२ फेब्रुवारी २०२६ रोजी राज्यातील सर्व जिल्ह्यांमध्ये एकाच दिवशी घेण्यात येणार आहे. ८ फेब्रुवारी २०२६ रोजी होणाऱ्या केंद्रीय शिक्षक पात्रता परीक्षेला राज्यातील अनेक प्राथमिक आणि माध्यमिक शिक्षक प्रविष्ठ झालेले असल्याने शिष्यवृत्ती परीक्षेच्या तारखेत बदल करण्यात आला आहे याची सर्व संबंधितांनी नोंद घ्यावी, असे महाराष्ट्र परीक्षा परिषदेमार्फत कळविण्यात आले आहे.

दरम्यान, विधी परीक्षा देखील लांबणीवर गेल्या आहेत. पहिल्या सत्रातील परीक्षा फेब्रुवारीत होणार आहेत. अभ्यासक्रमाचा शैक्षणिक कालावधी पूर्ण न झाल्यामुळे आणि प्रवेश उशिरा झाल्याने मुंबई विद्यापीठाने डिसेंबर महिन्यात घेण्यात येणारी विधी अभ्यासक्रमाची परीक्षा पुढे ढकलली. ही परीक्षा आता दीड महिन्यांनंतर म्हणजे ८ फेब्रुवारी रोजी होणार आहे. त्यामुळे विद्यार्थी आणि महाविद्यालयांमध्ये संभ्रमाचे वातावरण आहे.