Rajya Sabha by Election: लोकसभेत पिछेहाट, राज्यसभेत सरशी! पोटनिवडणुकीत १० पैकी ८ जागा एनडीए जिंकणार? अशी आहेत समीकरणं

दिल्ली, ता. १५ जून २०२४

लोकसभा निवडणुकीत महायुतीला अपेक्षित यश मिळाले नाही. देशात ४०० पार आणि राज्यात ४५ प्लसचा नारा दिलेल्या महायुतीला अवघ्या १७ जागा मिळाल्या. या धक्कादायक निकालामुळे लोकसभेत पिछेहाट झालेल्या महायुतीची राज्यसभा निवडणुकीत सरशी होणार आहे. कसं असेल राज्यसभा निवडणुकांचे समीकरण? जाणून घ्या सविस्तर..

राज्यसभेचे सदस्य असलेले सदस्य लोकसभेवर निवडून गेल्यानंतर 10 जागा झाल्या आहेत. रिक्त झालेल्या ज्या राज्यांमध्ये राज्यसभेच्या निवडणुका होणार आहेत त्याठिकाणी एनडीएचे सरकार आहे. तसेच रिक्त झालेल्या 10 जागांपैकी 7 जागा या भाजपाच्या आहेत, तर दोन जागा काँग्रेसच्या आणि 1 जागा आरजेडीची आहे.

या जागांमध्ये महाराष्ट्रातून राज्यसभेवर निवडून गेलेले पियुष गोयल आणि छत्रपती उदयनराजे भोसले यांच्या नावाचा समावेश आहे. महाराष्ट्रात एनडीएचं बहुमत असल्यानं या दोनही जागेवर एनडीएचे उमेदवार निवडून येणार येणार आहेत. दुसरीकडे काँग्रेसला या निवडणूकीत के सी वेणूगोपाल आणि दिपेंद्र हुड्डा यांच्या दोन जागा गमवाव्या लागणार आहेत.

केसी वेणुगोपाल हे राजस्थानहून राज्यसभेवर निवडून गेले आहेत, तर दिपेंद्र हुड्डा हरियाणातून राज्यसभेवर निवडून गेले आहेत. हरियाणा आणि राजस्थानमध्ये भाजपचं सरकार आहे. मात्र हरियाणाचं सरकार सध्या अपक्षाच्या पाठिंब्याने सत्तेत आहे.

दुष्यंत चौटाला यांच्या जननायक जनता पार्टीने भाजप सरकारचा पाठींबा काढून घेतल्याने भाजपसाठी ही जागा कठीण होण्याची शक्यता आहे. त्यामुळे राज्यसभा निवडणूकीत एनडीएला 10 पैकी 8 ते 9 जागा मिळण्याची शक्यता व्यक्त केली जात आहे.