Maharashtra Politics: आंबेडकर-ठाकरे एकत्र येणार? वंचितची मोठी घोषणा, पालिका निवडणुकीत नवी समीकरणं

राज्यात ठाकरे बंधूंच्या युतीसोबतच पुन्हा शिवशक्ती-भीमशक्ती एकत्र येण्याच्या हालचाली सुरु झाल्या आहेत. त्यासंदर्भात खुद्द आंबेडकर कुटुंबातूनच ठाकरेंसोबत युतीचे संकेत दिलेत. खरंतर महापालिका निवडणूकीत आंबेडकरी मतदान आपल्याकडे वळवण्यासाठी एकनाथ शिंदेंनी आनंदराज आंबेडकरांसोबत युतीची घोषणा केलीय. तर दुसरीकडे राज ठाकरेंसोबत युती होण्याचं जवळपास निश्चित असलं तरी मराठी मतांसोबतच दलित मतं आपल्याकडे वळवण्यासाठी ठाकरेही उत्सुक आहेत. मात्र आंबेडकर महाविकास आघाडीतील काँग्रेस आणि राष्ट्रवादीपेक्षा ठाकरेंशी युती करण्याची शक्यता अधिक आहे. त्याची कारणं काय आहेत? पाहूयात.

आंबेडकरांकडून पवारांचा भाजपचा हस्तक असा उल्लेख, त्यामुळे राष्ट्रवादीत नाराजी

लोकसभा निवडणुकीतील अनुभव पाहता काँग्रेससोबत युतीची शक्यता कमी

मविआतून बाहेर पडल्यानंतर ठाकरेंनी आंबेडकरांवर टीका करणं टाळलं

प्रबोधनकार ठाकरे आणि बाबासाहेब आंबेडकरांच्या विचारांचा वारसा हा समान धागा

खरंतर 2019 च्या लोकसभा निवडणुकीत 42 लाख मतं मिळवणारा वंचित फॅक्टर चर्चेत आला. तर पुढे शिवसेनेच्या फुटीनंतर 23 जानेवारी 2023 मध्ये ठाकरे आणि आंबेडकरांनी युतीची घोषणा केली. मात्र मविआच्या जागा वाटपाच्या तिढ्यामुळे आंबेडकर मविआतून बाहेर पडले. मात्र आता आगामी स्थानिक स्वराज्य संस्थांच्या निवडणुकीच्या पार्श्वभुमीवर आंबेडकरांनी युतीचे संकेत दिलेत. मात्र युतीपुढे कोणती आव्हानं आहेत? पाहूयात.

युतीपुढे जागा वाटपाचं सर्वात मोठं आव्हान

वंचित आणि मविआ कार्यकर्त्यांमध्य़े मनोमिलन अवघड

ठाकरेंचे हिंदुत्ववादी कार्यकर्ते आणि आंबेडकरी कार्यकर्त्यांमध्ये वैचारिक संघर्षाची शक्यता

ठाकरे आणि आंबेडकरांचा मुंबई, अकोला, संभाजीनगर, लातूर, सोलापूर आणि नांदेड प्रभाव आहे. त्यामुळे या महापालिकांमध्ये दलित आणि मराठी मतांची सांगड घातल्यास राज्यात सत्तेचं नवं समीकरण उदयाला येण्याची शक्यता आहे. त्यामुळे ठाकरे आणि आंबेडकर युतीसंदर्भात बोलणी कधी करणार आणि ठाकरे बंधूंपाठोपाठ प्रकाश आंबेडकर आणि उद्धव ठाकरे एकत्र येणार का? याचीच उत्सुकता आहे.