Maharashtra Politics: आता लवकरच 'ऑपरेशन टायगर 3'? शिवसेना खासदाराच्या दाव्यानं राजकीय वर्तुळात खळबळ

ठाकरे गटाचे सहा खासदार फुटले आहेत. सर्व खासदारांनी मंगळवारी रात्री दिल्लीत जाऊन नवीन गट स्थापन केला. खासदारांच्या गटाला लोकसभा अध्यक्ष ओम बिर्ला यांनी देखील मान्यता दिली सुद्धा आहे. राज्यात ऑपरेश टायगर यशस्वी झाल्याची चर्चा शिंदे गटात सुरू आहे. ही फोडाफोडीचं राजकारण शांत होत नाही तोच नव्या ऑपरेशन टायगर -३ ची चर्चा सुरू झाली आहे.

ठाकरे गटातील खासदार, आमदार पक्ष नेतृत्त्वावर नाराज असून ते पक्ष सोडून जात आहेत. इतकेच नाही तर नगरसेवकांमध्ये सुद्धा नाराजीचं वातावरण असल्याची चर्चा आहे. त्यामुळे आता पुढच्या ऑपरेशन नगरसेवकांना टार्गेट करत त्यांना फोडलं जाणार का असा सवाल राजकीय वर्तुळातून केला जातोय. त्याला कारण ठरलंय, शिंदे गट शिवसेनेचे खासदार नरेश म्हस्के यांचं विधान. हो, नरेश म्हस्के यांनी त्याबाबत विधान करत राजकीय वर्तुळ नवीन वादळ उठवून दिलंय.

ठाकरे गटाचे खासदार दिल्लीला जात त्यांनी लोकसभा अध्यक्ष ओम बिर्ला यांना पत्र देत वेगळा गट स्थापन करण्याची मंजुरी मागितली. लोकसभा अध्यक्षाच्या समोर सर्व खासदारांनी त्या पत्रावर सह्या केल्या. त्यानंतर लोकसभा अध्यक्षांनी त्यांच्या गटाला मंजुरी दिली आहे. फुटीर खासदारांकडे एक तृतीयांश नंबर असल्यानं त्याच्या गटाला अधिकृत मान्यता देण्यात आली आहे.

त्यानंतर ठाकरे गटाचे खासदार संजय राऊत आणि अरविंद सावंत यांनी पत्रकार परिषद घेत फुटीर खासदारांवर कायदेशीर कारवाई करण्याचा इशारा दिला. त्यावर शिंदे गटाचे खासदार नरेश म्हस्के यांनी प्रतिक्रिया देताना तिसऱ्या ऑपरेशन टायगर राबवण्यात येणार असल्याचे संकेत दिलेत. त्याच्या म्हणण्यांनुसार येत्या काळात पुन्हा एकदा ठाकरे गटाला खिंडार पडू शकते. खासदारानंतर आता मुंबई महापालिकेत शिवसेना ठाकरे गटाला भगदाड पडण्याची शक्यता आहे. ठाकरेंचे नगरसेवकही त्यांची साथ सोडणार असल्याचं म्हस्के यांनी म्हटलंय.

ठाकरे गटातील नेते का नाराज आहेत?

काही दिवसांपासून ठाकरे सेनेतील नेते पक्ष नेतृत्त्वावर नाराज असल्याची चर्चा आहे. मतदारसंघातील कामांना प्रतिसाद मिळत नाहीये. स्थानिक निवडणुकांमध्ये पक्षाची होत असलेली घसरण तसेच आदित्य ठाकरे दौरे करत नसल्यानं नेते मंडळी नाराज आहेत. मतदारसंघात नेत्याची लोकप्रियता घसरत असल्याची माहितीही सुत्रांनी दिली आहे.