Maharashtra Politics: ठाकरेंविरोधात पवार-शिंदे एकत्र; स्थानिक निवडणुकीसाठी नवं समीकरण, राजकारणात नवा सोलापूर पॅटर्न

स्थानिक स्वराज्य संस्थांच्या निवडणुकीला रंग येण्यास सुरुवात झालीय. राज्यात महायुती आणि महाविकास आघाडी एकत्र लढण्याच्या वल्गना केल्या जात असल्या तरी सोलापूर जिल्ह्यात मात्र महायुती आणि मविआत फूट पडलीय. कुर्डुवाडी नगरपरिषद निवडणुकीत ठाकरेसेनेला रोखण्यासाठी मित्रपक्ष असलेल्या पवारांच्या राष्ट्रवादीने शिंदेसेनेसोबत युती केलीय. तर या युतीची पायाभरणी केलीय पवारांचे खासदार धैर्यशील मोहिते पाटील यांनी मात्र शिंदेसेना आणि पवारांच्या राष्ट्रवादीचा नेमका काय फॉर्म्युला ठरलाय? पाहूयात.

कुर्डुवाडी नगरपरिषदेच्या 20 जागांपैकी 10 जागांवर शिंदेसेना तर 10 जागांवर पवारांच्या राष्ट्रवादीचे उमेदवार देण्यात येणार आहेत. मात्र नगराध्यक्षपद हे शिंदेसेनेला सोडण्यात आलंय. खरंतर कुर्डुवाडी नगरपरिषदेवर ठाकरेसेनेच्या धनंजय डिकोळे यांचं वर्चस्व आहे. मात्र आता हे वर्चस्व मोडून काढण्यासाठी महाविकास आघाडीतील मित्रपक्ष असलेल्या ठाकरेसेनेचे कट्टर विरोधक शिंदेसेनेसोबत युतीचा निर्णय घेतलाय.

सिंधुदुर्गमध्ये एकमेकांचे कट्टर विरोधक शिंदेसेना आणि ठाकरेसेना एकत्र येत असल्याची चर्चा रंगलीय. दुसरीकडे पुणे आणि बीड जिल्ह्यात दोन्ही राष्ट्रवादी एकत्र येत आहेत. तर रायगड जिल्ह्यातील महाडमध्ये शिंदेसेनेला वगळून अजित पवारांची राष्ट्रवादी आणि भाजप एकत्र येत आहेत. त्यामुळे सोयीनुसार तत्वांची भाषा करणारे अनेकजण एकमेकांच्या गळ्यात गळे घालून स्थानिक स्वराज्य संस्थेतील सत्तेची उब घेण्यासाठी सरसावले आहेत.