Maharashtra Politics: शिंदेंच्या शिवसेनेत मोठा उलटफेर होणार; अनेकांचा पत्ता होणार कट

बारामती विधानसभा आणि राहुरी विधानसभा पोटनिवडणुकांमुळे राजकीय वातवारण तापले आहे. त्याचदरम्यान एकनाथ शिंदेंच्या नेतृत्वातील शिवसेनेत मोठ्या घडामोडी घडत आहेत. काही दिवसांपूर्वीच संपर्कप्रमुखांच्या नावांची घोषणा केली होती, आता पक्षात उलटफेर केला जाणार आहे. यात अनेकांचा पत्ता कट होण्याची शक्यता आहे. पक्षश्रेष्ठी मंत्री आणि पदाधिकाऱ्याच्या कामावार लक्ष ठेवणार आहे, त्यामुळे पक्षातील नेत्यांमध्ये धाकधूक वाढली आहे.

एकनाथ शिंदे शिवसेनेत मोठे संघटनात्मक बदल करणार आहेत.निष्क्रीय आणि काम नं करणाऱ्या पदाधिकाऱ्यांना थेट पदावरून हटवलं जाणार आहे. त्या पार्श्वभूमीवर राज्यभरातील प्रमुख पदाधिकाऱ्यांच प्रगती पुस्तक 15 दिवसात तयार करण्यात येणार आहे. सर्व मंत्र्यांच्या कामगिरीवरही लक्ष ठेवलं जातंय. याबाबत माहिती देताना मंत्री उदय सामंत म्हणाले, आम्हाला आज सर्व आमदार खासदार यांना मार्गदर्शन केले.

शिंदेसाहेब कायम ऍक्टिव मोडवर असतात. आता संपर्क प्रमुख निवडले आहेत. काय काम केली याचा आढावा घेतला. आता लोकसभा नाही तर तालुका आणि गाव स्तरावर नेत्यांच्या कामाचा आढावा घेतला जाणार आहे. जे काम करत नाही, नुसती पद घेतली आहेत अश्याना बाजूला करून नव्याना संधी देतील. 11 तारखेपासून महाराष्ट्र दौरा केला जाणार आहे. प्रगती पुस्तक काही दिवसात येईल. निवडणुकीत यश मिळालं नाही, अशांना साहेब थांबवतील. माझंदेखील काम बघितलं जाणार आहे, असं सामंत म्हणालेत.

निवडणुका संपल्यात आता पक्ष वाढीचा हंगाम सुरु झालाय. राज्यात शिवसेनेला बळकट करण्यासाठी तळागाळातील शिवसैनिकांपर्यंत पोहोचा, जनतेच्या प्रश्नांवर तत्परतेनं काम करा आणि पक्षवाढीसाठी योगदान देण्याचे निर्देश शिवसेना मुख्य नेते व राज्याचे उपमुख्यमंत्री एकनाथ शिंदे यांनी शिवसेनेच्या सर्व आमदार, खासदार, विभागीय संपर्कप्रमुख, सह संपर्कप्रमुख तसेच लोकसभा संपर्कप्रमुखांना दिले. मतदार याद्यांचे बारकाईने पुनरावलोकन करण्यासाठी बूथ प्रतिनिधींची नियुक्ती करा, काम दिसले नाही तर पद राहणार नाही, अशी तंबीच उपमुख्यमंत्री शिंदे यांनी यावेळी पदाधिकाऱ्यांना दिली.

नुकताच शिवसेनेकडून संपर्कप्रमुख, विभागीय संपर्कप्रमुख आणि लोकसभा संपर्कप्रमुखांची नियुक्ती करण्यात आली होती. त्यांची महत्त्वपूर्ण ऑनलाईन आढावा व मार्गदर्शन बैठक उपमुख्यमंत्री शिंदे यांच्या उपस्थितीत आज पार पडली. या बैठकीत उपमुख्यमंत्री शिंदे यांनी मंत्री, आमदार, खासदार यांना पद विसरुन कार्यकर्ता म्हणून पक्षाचे काम करण्याचे निर्देश दिले. मतदार संघांच्या विभाजनानंतर स्थानिक स्वराज्य संस्था, विधानसभा, लोकसभा निवडणुकांच्या अनुषंगाने उपमुख्यमंत्री शिंदे यांनी संपर्क प्रमुखांना कामाचा रोडमॅप दिला.