Dr. Shrikant Shinde : अंबरनाथमध्ये महायुतीत बिनसलं? श्रीकांत शिंदेंचं भाजपाला रोखठोक आवाहन

राज्यात स्थानिक स्वराज्य संस्थांच्या निवडणूकांची सध्या जोरदार तयारी सुरु आहे. ठिकठिकाणी प्रचाराला सुरुवात झाली असून उमेदवारी जाहीर करण्यात येत आहे. अशातच अंबरनाथ नगरपालिकेच्या आगामी निवडणुकीसाठी भाजपाकडून प्रदेश सचिव गुलाबराव करंजुले यांच्या सून तेजश्री करंजुले यांचे नाव पुढे आलं आहे. भाजपाच्या कार्यकर्ता मेळाव्यात नंदू परब यांनी केलेल्या वक्तव्यावर खासदार डॉ. श्रीकांत शिंदे यांनी ताकद आजमावायची असेल तर आमच्याकडेही पैलवान तयार आहे, अशा शब्दात भाजपाला आव्हान दिलं आहे.

अंबरनाथच्या शिवसेना शिंदे गटाच्या जनसंपर्क कार्यालयाचे उद्घाटन खासदार श्रीकांत शिंदे त्यांच्या हस्ते पार पडले. यावेळी शहरातील विविध प्रभागातील निवडणूक कार्यालयाचं उद्घाटन करण्यात आले. माजी नगरसेवक कुणाल भोईर यांच्या कार्यालयाच्या उद्घाटनानंतर माध्यमांशी बोलताना डॉक्टर श्रीकांत शिंदे यांनी भाजपा जिल्हाध्यक्ष नंदू परब यांना आव्हान दिलं आहे.

काय म्हणाले डॉ. श्रीकांत शिंदे?

डॉ. श्रीकांत शिंदे म्हणाले," मी महायुतीचा कार्यकर्ता असून आगामी निवडणुका महायुतीतच व्हाव्यात अशी माझी इच्छा आहे. परंतु कुणाला जर वेगळं लढायचं असेल, तर आमचीही तयारी असून ताकद आजमावायची असेल, तर आमच्याकडेही पैलवान तयार आहे." असं आव्हान खासदार डॉ. श्रीकांत शिंदे यांनी दिलं आहे.

काय म्हणाले भाजपा जिल्हाध्यक्ष नंदू परब ?

अंबरनाथ नगरपालिकेच्या आगामी निवडणुकीसाठी भाजपाकडून प्रदेश सचिव गुलाबराव करंजुले यांच्या सून तेजश्री करंजुले यांचे नाव पुढे आलं असून नुकत्याच झालेल्या भाजपाच्या कार्यकर्ता मेळाव्यात अंबरनाथ पालिकेत एक लाख टक्के भाजपाचाच नगराध्यक्ष बसेल, असा दावा भाजपा जिल्हाध्यक्ष नंदू परब यांनी केला होता.