Maharashtra Politics 2024: महायुतीत ठिणगी पडणार? : चिंचवड आणि भोसरी मतदारसंघावर अजित पवार गटाचा दावा

गोपाल मोटघरे

पिंपरी चिंचवड शहराच्या विकासात अजित पवार गटाचा मोठ वाटा आहे. अजित पवार गटाची ताकदही मोठी आहे. मात्र चिंचवड आणि भोसरी विधानसभा मतदारसंघ महायुतीत सध्या भाजपकडे आहेत. भाजपचे दोन विद्यमान आमदार या मतदारसंघात आहेत. मात्र राष्ट्रवादी काँग्रेस अजित पवार गटाने या मतदारसंघांवर दावा केला आहे. त्यामुळे महायुतीत मिठाचा खडा पडण्याची शक्यता निर्माण झाली आहे.

लोकसभा निवडणुकीत अजित पवार गटाला म्हणावं तसं यश आलेलं नाही. मात्र विधानसभा निवडणुका काही महिन्यांवर येऊन ठेपल्या आहेत. अजित पवार गटाच्या नेत्यांनी या विधासभा निवडणुकीसाठी आतापासूनच दंड थोपटले आहेत. विधानसभेत लोकसभेपेक्षा एकदम वेगळं चित्र असेल, असं राष्ट्रवादीच्या नेत्यांचं म्हणणं आहे. पिंपरी चिंचवड शहरापासून त्याची सुरुवात होण्याची शक्यता आहे.

पिंपरी चिंचवड शहरातील पिंपरीत अण्णा बनसोडे अजित पवार गटाचे आमदार आहेत. तर भोसरी मतदारसंघात भाजपचे महेश लांडगे आणि चिंचवडमध्ये अश्विनी जगताप विद्यमान आमदार आहेत. तर मावळात सुनील शेळके आमदार आहेत. मात्र महायुतीत भोसरी आणि चिंचवड मतदारसंघ भाजपकडे आहेत. त्यांचे विद्यमान खासदार आहेत. तरीही अजित पवार गटाने यावर दावा केल्यामुळे जागा वाटपावेळी ठिणगी पडण्याची शक्यता आहे.

राष्ट्रवादीने जरी भोसरी आणि चिंचवड विधानसभा क्षेत्रावर दावा केला असला तरी या दोन्ही जागा भाजप कडेच आहेत आणि भाजपकडेच राहतील असा विश्वास पिंपरी चिंचवड शहराचे भारतीय जनता पक्षाचे शहराध्यक्ष शंकर जगताप यांनी व्यक्त केला आहे. सध्या ज्या जागांवर ज्या पक्षाचा आमदार आहे. त्या जागा महायुती त्याच पक्षाकडे असतील असा फॉर्मुला महायुती ठरला आहे. आणि मी स्वतः चिंचवड विधानसभा क्षेत्रातून भाजपकडून निवडणूक लढवण्यास इच्छुक आहे अशी इच्छा देखील शंकर जगताप यांनी व्यक्त केली आहे.