Maharashtra Politics : महानगरपालिका निवडणुकीपूर्वी उद्धव ठाकरेंना मोठा धक्का! 'हा' बडा नेता धनुष्यबाण हाती घेणार

जालन्यात महानगरपालिका निवडणुकीपूर्वी उद्धव ठाकरे गटाला मोठा धक्का बसणार आहे. ठाकरे गटाचे जिल्हाप्रमुख आज समर्थकांसह शिवसेना शिंदे गटामध्ये प्रवेश करणार आहे. आज उपमुख्यमंत्री एकनाथ शिंदे हे जालना जिल्हा दौऱ्यावर असताना जिल्हाप्रमुख भास्कर आंबेकर धनुष्यबाण हाती घेणार आहे. यामुळे जालन्यात महानगरपालिका निवडणुकीपूर्वी ठाकरे गटात नाराजी पाहायला मिळत आहे.

आंबेकर गेली तीन ते साडेतीन दशकांपेक्षा अधिक काळ ते उबाठा गटाशी एकनिष्ठ आहेत. पक्षात फूट पडल्यावर त्यांनी एकनाथ शिंदे यांच्या सोबत जाण्याऐवजी उध्दव ठाकरे यांच्या सोबतच राहण्याचा निर्णय घेतला. महाविद्यालयीन विद्यार्थी संसदेच्या राजकारणापासून पुढील काळात आमदार अर्जुन खोतकर यांच्यासोबत असणारे आंबेकर शिवसेनेतील फुटीनंतर मात्र मशाल हातात घेऊनच थांबले. ठाकरे यांच्या नेतृत्वाखालील शिवसेनेची साथ सोडून आता ते राजकीय दृष्ट्या पुन्हा खोतकर यांच्यासोबत एका पक्षात येणार आहेत.

आंबेकर यांचे नेतृत्व स्थानिक नगरपरिष‌देच्या राज‌कारणातून पुढे आले. जवळपास ‌वीस वर्ष नगर परिषद सदस्य होते. दोन वेळेस ते नगराध्यक्ष होते. यापैकी एकदा ते प्रत्यक्ष निवडणुकीतून विजयी झाले. २०१९ पासून ते उध्दव ठाकरे यांच्या नेतृत्वाखालील शिवसेनेचे जिल्हा प्रमुख आहेत. शिवसेनेचे जालना शहरप्रमुख, उपजिल्हा प्रमुख, गोदावरी मराठवाडा पाटबंधारे विकास महामंडळ आणि जालना बाजार समितीचे उपाध्यक्ष, राज्य बियाणे महामंडळाचे संचालक इत्यादी पदांवर राहीलेले आंबेकर शैक्षणिक , क्रीडा आणि सामाजिक क्षेत्राशी संबंधित आहेत.

जालना विधानसभेचे पाच वेळेस प्रतिनिधित्व करणारे अर्जुन खोतकर यांचे कॉलेजपासूनचे मित्र अशी आंबेकर यांची ओळख आहे. कांही दिवसांपूर्वी त्यांनी खोतकर यांच्यासोबत एकनाथ शिंदे यांची भेट घेतली होती. दरम्यान आज उपमुख्यमंत्री एकनाथ शिंदे हे जालना जिल्हा दौऱ्यावर असताना भास्कर आंबेकर उपमुख्यमंत्री एकनाथ शिंदे यांच्या उपस्थितीत धनुष्यबाण हाती घेणार आहेत. आमदार अर्जुन खोतकर यांच्या प्रयत्नांना यश आलं असून या प्रवेशामुळे शहरासह ग्रामीण भागात शिवसेनेची ताकद वाढणार आहे.तसेच जालना शहर महानगरपालिका निवडणूक समीकरण देखील बदलणार असल्याचं बोलल जात आहे.