Maharashtra Politics: ठाकरे गटात अंतर्गत वाद उफाळला; 82 पदाधिकाऱ्यांचे धडाधड राजीनामे, सामूहिक राजीनाम्यांनी राज्यात खळबळ

उद्धव ठाकरे यांच्या पक्षाला परभणीत मोठा धक्का बसला आहे. गेल्या काही दिवसांपासून परभणीत मोठ्या राजकीय हालचाली होत आहे. येथील ठाकरे गटाचे खासदार संजय जाधव यांच्या विधानामुळे पक्षातील नेत्यांमध्ये चलबिचल सुरू होती. त्याच दरम्यान उद्धव ठाकरेंनी पक्षात सर्जिकल स्ट्राइक करत येथील जिल्हा प्रमुख गंगाप्रसाद आनेराव यांची हकालपट्टी केली. मात्र आता त्याचे पडसाद जिल्ह्यात उमटत आहेत. पक्षातील 82 पदाधिकाऱ्यांनी धडाधड राजीमाने दिले आहेत. या सामुहिक राजीमान्यांनुळे खळबळ उडाली आहे.

माजी जिल्हाप्रमुख गंगाप्रसाद आनेराव यांना पदावरून हटवल्याने पदाधिकाऱ्यांमध्ये नाराजीचे वातावरण आहे. त्याच नाराजीतून त्यांनी राजीनामे दिले आहेत. गंगाप्रसाद आनेराव हे शिवसेना भवन येथे आयोजित बैठकीला गैरहजर असल्यामुळे पक्षश्रेष्ठींकडून त्यांच्यावर कारवाई करण्यात आली होती. आता त्यांच्या समर्थनार्थ 82 पदाधिकाऱ्यांनी राजीनामे दिले आहेत.

दरम्यान गंगाप्रसाद आनेराव हे खासदार संजय जाधव यांचे निकटवर्तीय आहेत. संजय जाधव हे ठाकरेंची साथ सोडण्याची चर्चा सुरू असताना डॅमेज कंट्रोल करण्यासाठी ठाकरेंनी कारवाई करत आनेराव यांना पदावरून हटवले होतं. मात्र आता त्याचे उलटे पडसाद पाहायला मिळत आहे. येत्या आठ दिवसात उद्धव ठाकरेंनी निर्णय मागे घेतला नाही तर आम्ही सदस्य पदाचा देखील राजीनामा देणार असल्याचा इशारा दिला आहे. त्यामुळे आता यावर उद्धव ठाकरे काय निर्णय घेणार याकडे सर्वांचे लक्ष लागले आहे.