Maharashtra Monsoon Update: राज्यात कधीपासून सुरू होणार पाऊस? मान्सूनबाबत महत्वाची अपडेट आली समोर

राज्यात यावर्षी पावसानं चांगलीच ओढ दिल्यानं शेतकरी वर्ग संकटात सापडला आहे. मुंबई आणि महाराष्ट्रात जूनच्या तिसऱ्या आठवड्यातही आपण उन्हाचा तडाखा जाणवत आहे. त्याच दरम्यान मान्सूनबाबत एक दिलासादायक बातमी हाती आली आहे. येत्या आठवड्यात साधारणपणे २२-२३ तारखेपासून, दक्षिण कोकण आणि महाराष्ट्राच्या लगतच्या भागात मान्सून पुन्हा सक्रिय होण्याची शक्यता आहे.

पावसाचा जोर हळूहळू वाढून २४ ते २६ जूनदरम्यान तो उत्तर कोकण आणि महाराष्ट्राच्या अंतर्गत भागापर्यंत पोहोचू शकतो. हवामानाच्या मॉडेल्सनुसार, आगामी दिवसात राज्यातील बहुतांश भागात पाऊस पडण्याची शक्यता असून जूनच्या अखेरीपर्यंत पाऊस कोसळणार आहे.

मुंबईत मान्सूनचे आगमन कधी होणार?

मागील २०१९ व २०२३ अशा एल-निनोच्या गत दोन वर्षात मुंबईत मान्सूनचे १४ दिवस उशिराने आगमन झाले. यावर्षीही एल-निनोचे वर्ष आहे आणि अद्याप मुंबईत मान्सून पोहोचला नाही. २०२६ च्या एल-निनो वर्षात सुद्धा मान्सूनचे गुरुवार दिनांक २५ जूनला मुंबईत आगमनाची शक्यता आहे, याबाबत होसाळीकर यांनी एक्सवर पोस्ट केली आहे.

मान्सून २५ जून ते बुधवार दिनांक १ जुलै दरम्यान मुंबईसह संपूर्ण कोकणात जोरदार मान्सूनची शक्यता आहे. मुंबईतील दिवसाच्या दमट व रात्रीच्या उकाड्यापासुन मुंबईकरांना दिलासा कधीपासून मिळू शकतो. आज शनिवार दिनांक २० जून पासूनच वातावरण बदलण्यास सुरूवात झाली आहे. मुंबईकरांना दिवसाच्या दमटपणा व रात्रीच्या उकाड्यापासून काहीसा दिलासा मिळू शकतो, असे वाटते.

उर्वरित महाराष्ट्रात मान्सून कधी

मुंबईतील मान्सूनच्या आगमनानंतर म्हणजे जुनच्या शेवटच्या आठवड्यात खान्देश, नाशिक अहमदनगर, पुणे सातारा कोल्हापूर व पश्चिम मराठवाड्यातील जिल्ह्यात मान्सूनचा पाऊस होईल अशी शक्यता आहे. पूर्व मराठवाडा व विदर्भात मात्र जुलै पहिल्या व दुसऱ्या आठवड्यात मान्सून च्या पावसाची शक्यता आहे.