Maharashtra Assembly Election : २४ तासात राज्यात आचारसंहिता लागणार, कोणत्याही क्षणी निवडणुकीची घोषणा होणार

Maharashtra Assembly Election Date : महाराष्ट्राच्या राजकीय वर्तुळातून एक मोठी बातमी समोर आली आहे. राज्यात उद्यापासून आचारसंहिता लागण्याची शक्यता आहे. निवडणूक आयोगाकडून उद्या पत्रकारपरिषद घेण्यात येणार असल्याची माहिती समोर आली आहे. यामध्ये झारखंड आणि महाराष्ट्रातील विधानसभा निवडणुकांची घोषणा होण्याची शक्यता आहे.

महायुती सरकारची शेवटची मंत्रिमंडळ बैठक -

राज्यात कोणत्याही क्षणी विधानसभा निवडणुकीची घोषणा होऊ शकते. त्याआधी राज्यात निर्णायांचा सपाटा सुरु आहे. आज होणारी राज्य मंत्रिमंडळाची बैठक सरकारसाठी महत्वाची आहे. आचारसंहिता लागण्याच्या आधी अनेक निर्णय आज सरकार घेण्याची शक्यता वर्तवण्यात येत आहे. महायुती सरकारची आजची शेवटची कॅबिनेट बैठक असेल. आजच्या कॅबिनेट बैठकीनंतर येणा-या २४ तासात कधीही आचारसंहिता लागू शकते, अशी माहिती वरीष्ठ प्रशासकीय सूत्रांने साम टीव्हीला दिली आहे. राज्य मंत्रिमंडळाच्या बैठकीला छगन भुजबळ, अतुल सावे, रवींद्र चव्हाण, धनंजय मुंडे सह्याद्री अतिथीगृहवर दाखल झाले आहेत.

कोणत्याही क्षणी आचारसंहिता -

राज्यात पुढील २४ तासात आचारसंहिता लागण्याची शक्यता आहे. निवडणूक आयोग महाराष्ट्र आणि झारखंडमध्ये विधानसभा निवडणुकीची घोषणा करु शकते. महाराष्ट्रातील विधानसभेचा कार्यकाळ २६ नोव्हेंबर रोजी संपत आहे. त्याआधी २८८ मतदारसंघात निवडणुका होतील, असे केंद्रीय निवडणूक आयोगाने स्पष्ट केले होते.

महाराष्ट्र झारखंडमधील विधानसभा निवडणुकीची घोषणा केंद्रीय निवडणूक आयोगाकडून मंगळवारी केली जाऊ शकते. त्यामुळे २४ तासांनंतर राज्यात आदर्श आचारसंहिता लागू होण्याची शक्यता आहे. महाराष्ट्रात २८८ जागांवर तर झारखंडमध्ये ८१ जागांवर दोन टप्प्यात निवडणुका होण्याची शक्यता आहे. १५ नोव्हेंबर रोजी मतदान होण्याची शक्यता आहे.