गरीब ब्राह्मण विद्यार्थ्यांसाठी मोठी खुशखबर! शिक्षण ते नोकरीपर्यंत मिळणार 50 कोटींची मदत

विशाल शिंदे, साम टीव्ही

परभणी: परशुराम आर्थिक विकास महामंडळाची स्थापना राज्य सरकारने राज्यातील गरीब ब्राह्मण कुटुंबातील विद्यार्थ्यांना योग्य त्या सोयी सुविधा मिळवून देऊन त्यांना आर्थिक दृष्ट्या सक्षम करण्यासाठी केली आहे. त्या अनुषंगाने राज्य सरकारने परशुराम आर्थिक विकास महामंडळाला 50 कोटी रुपयांची तरतूद केली आहे.

या निधीच्या माध्यमातून राज्यातील ग्रामीण भागात राहणाऱ्या गरीब ब्राह्मण कुटुंबातील विद्यार्थ्यांना शिक्षणासाठी नोकरीसाठी मदत केली जाणार आहे. अशा दुर्बल ब्राह्मण घटकांना न्याय देण्याचे काम हे महामंडळ करणार आहेत. त्याचबरोबर ज्यांना उद्योग व्यवसाय करायचा आहे त्यांना देखील महामंडळाच्या माध्यमातून कर्ज उपलब्ध करून दिले जाणार आहे. उद्योगासाठी आतापर्यंत तब्बल 60 ते 65 अर्ज आले असून त्यापैकी 12 ते 13 जणांना कर्ज उपलब्ध करून देण्यात आले आहे.

ब्राह्मण समाजातील वंचित घटकांना न्याय देण्यासाठी हे महामंडळ काम करणार आहे. यासाठी राज्यातील सर्वच ब्राह्मण संघटनांकडून आम्ही सूचना घेत आहोत त्यांच्याशी संवाद साधत आहोत आणि सर्वांशी संवाद साधल्यानंतर आणखी अजून काय करता येईल यासंदर्भात देखील आम्ही प्रयत्न करणार असल्याचे कॅप्टन आशिष दामले म्हणाले