Mahad Viral News: महाडमध्ये भररस्त्यात रेड्याचा धुमाकूळ, अनेकांना शिंगावर उचलून फेकलं; लोक जीव मुठीत घेऊन पळाले, थरारक VIDEO

सचिन कदम, रायगड

रायगड जिल्ह्यातल्या महाडमधून (Mahad) धक्कादायक बातमी समोर येत आहे. एका उधळलेल्या रेड्याने महाडमध्ये पाच ते सहा जणांना धडक दिली. महाड शहरामधील काकर तळे येथील ही घटना आहे. उधळलेल्या रेड्याने धडक दिल्याने पाच ते सहा जण जखमी झाले आहेत. त्यांच्यावर रुग्णालयात उपचार सुरू आहेत. या घटनेमुळे खळबळ उडाली आहे. महाडमध्ये सध्या या रेड्याची दहशत पाहायला मिळत आहे.

मिळालेल्या माहितीनुसार, उधळलेला रेडा महाडच्या काकर तळे, महाड एसटी स्टँड, सुंदरवाडी रस्त्यावर मोकट धावत सुटला होता. यावेळी या रेड्याने ५ ते ६ नागरिकांना धडक दिली. या रेड्याने या सर्वांना आपल्या शिंगावर उचलून खाली फेकले. या घटनेमध्ये हे सर्वजण गंभीर जखमी झाले आहेत. जखमींना महाड ट्रॉम केअर युनिट आणि खासगी रुग्णालयात उपचारासाठी दाखल करण्यात आले आहे.

जखमींमध्ये पादचारी आणि दुचाकीस्वारांचा समावेश आहे. घटनेची माहिती मिळताच पोलिसांनी घटनास्थळी धाव घेतली. स्थानिकांच्या मदतीने जखमींना त्यांनी तात्काळ रुग्णालयात दाखल केले. पोलिस, नगर पालिका प्रशासन आणि पशु वैद्यकिय विभागाचे कर्मचारी या उधळलेल्या रेड्याला पकडण्याचा प्रयत्न करत आहे.