NEET UG Exam: नीट परीक्षा रद्द झाल्याने विद्यार्थ्याची आत्महत्या, सुसाईड नोट सापडली

Summary:

• नीट परीक्षेच्या पेपरफुटीनंतर परीक्षा रद्द

• परीक्षा रद्द झाल्यामुळे विद्यार्थ्याची आत्महत्या

• राहत्या घरी गळफास घेत आयुष्य संपवलं

नीट परीक्षा रद्द झाल्यामुळे विद्यार्थ्याने आत्महत्या केल्याची घटना समोर आली आहे. गोव्यामध्ये राहणाऱ्या १७ वर्षीय विद्यार्थ्याने नीटची परीक्षा दिली होती. त्याला पेपरही चांगला गेला होता. पण अचानक नीटची परीक्षा रद्द झाल्याचे कळताच हा विद्यार्थी चिंतेत आला. त्याने राहत्या घरी गळफास घेत आयुष्य संपवलं. या घटनेमुळे गोळ्यात खळबळ उडाली आहे. पोलिल सध्या या प्रकरणाचा तपास करत आहेत.

मिळालेल्या माहितीनुसार, गोव्यातील कुडतरी येथे ही घटना घडली. नीट परीक्षा रद्द झाल्याचे ऐकून विद्यार्थ्याने आत्महत्या केली. परीक्षआ रद्द झाल्याचा धसका घेऊन या विद्यार्थ्याने टोकाचे पाऊल उचलले. मंगळवारी रात्री राहत्या घरामध्ये त्याने गळफास घेतला. आत्महत्येपूर्वी या विद्यार्थ्याने सुसाईड नोट लिहील होती. ही सुसाईड नोट पोलिसांना सापडली. आपल्याला यापुढे स्पर्धात्मक परीक्षेत बसायचे नाही. मी आयुष्य संपवत असल्याचे त्याने सुसाइड नोटमध्ये लिहिले.

पोलिसांनी सांगितले की, मडगावातील एका उच्च माध्यमिक विद्यालायात हा विद्यार्थी शिकत होता. हा विद्यार्थी मूळचा कर्नाटक राज्यातील बंगळुरू येथील होता. त्याचे वडील रेल्वेत गार्ड म्हणून कामाला आहेत. तो कुटुंबीयांसोबत गोव्यात राहत होता. त्याची आई आणि बहीण मूळ गावी गेल्या होत्या. घरात कुणी नसताना त्याने गळफास घेत आत्महत्या केली.

या विद्यार्थ्याचे वडील बाहेर गेले होते. घरी आल्यानंतर त्यांना आपला मुलगा गळफास घेतलेल्या अवस्थेत दिसला. घरातील चित्र पाहून त्यांच्या पायाखालची जमीन सरकली. त्यांनी तात्काळ पोलिसांना घटनेची माहिती दिली. पोलिसांनी घटनास्थळी धाव घेत विद्यार्थ्याचा मृतदेह ताब्यात घेत दक्षिण गोवा जिल्हा रुग्णालयामध्ये शवविच्छेदनासाठी पाठवला. या प्रकरणी मायणा कुडतरी पोलिसांनी विद्यार्थ्याच्या मृत्यूची नोंद करत तपास सुरू केला आहे.