Latur News : लातूरमध्ये अवैध गर्भपाताचं प्रकरण उघड; महिलेच्या पतीसह नर्स पोलिसांच्या ताब्यात

संदीप भोसले 

लातूर : लातूर जिल्ह्यातील उदगीर शहरात अवैध गर्भपात करण्यात येत असल्याचे प्रकरण समोर आले होते. पोलीस व आरोग्य विभागाच्या पथकाने छापा टाकत कारवाई केली होती. आता या प्रकरणात पीडित महिलेच्या पतीसह एका नर्सला पोलिसांनी ताब्यात घेतले आहे. 

लातूर जिल्ह्यातील (Udgir) उदगीर शहरातील आफिया क्लिनिक होते. मात्र या ठिकाणी अवैद्यपाने गर्भपात केले जात होते. दरम्यान या केंद्रात गर्भपात करत असल्याची माहिती पोलिस (Police) आणि वैद्यकीय अधिकाऱ्यांना मिळाली होती. या मिळालेल्या माहितीच्या आधारे पोलिसांसह आरोग्य विभागाच्या पथकाने छापा टाकत बोगस डॉ. अरीफोदीन उर्फ इरफान मोमीन याला अवैध गर्भपात करताना रंगेहात पकडले होते. या प्रकरणामुळे शहरात खळबळ उडाली आहे. 

पतीलाही घेतले ताब्यात 

मात्र आता या प्रकरणात क्लिनिकमध्ये मदत करणाऱ्या एका नर्सला आणि अवैध गर्भपात करण्याचे साहित्य पुरवणाऱ्या व्यक्ती अशा दोघांना पोलिसांनी ताब्यात घेतले होते. तसेच या प्रकरणात पीडित महिलेच्या पतीला देखील पोलिसांनी अटक केली आहे. तर या सर्व आरोपींना न्यायालयाने तीन दिवसाची पोलीस कोठडी सुनावली आहे. तसेच शहरात गर्भलिंग निदान व गर्भपात करणारे मोठे रॅकेट सक्रिय असल्याची शक्यता वर्तविण्यात आली असल्याने पोलिस आणि वैद्यकीय अधिकाऱ्यांचे एक पथक त्या दृष्टीने तपास करत आहे.