Ladki Bahin Yojana: लाडक्या बहिणींना २१०० रुपये कधी मिळणार? मंत्री उदय सामंतांनी स्पष्टच सांगितलं

लाडकी बहीण योजनेत महिलांच्या खात्यात आजपासून एप्रिलचा हप्ता जमा होण्यास सुरुवात झाली आहे. लाडकी बहीण योजनेत सध्या महिलांना १५०० रुपये दिले जात आहे. दरम्यान, विधानसभा निवडणूकीपूर्वी लाडक्या बहि‍णींना २१०० रुपये देण्याचे आश्वसन महायुती सरकारने दिले होते. यानंतर आता मंत्री उदय सामंतांनीदेखील लाडकी बहीण योजनेसंदर्भात महत्त्वाचे विधान केले आहे.

उदय सामंत काय म्हणाले? (Uday Samant On Ladki Bahin Yojana)

लाडकी बहीण योजनेत महिलांना २१००० रुपये कधी मिळणार याकडे सर्वांचेच लक्ष लागले आहे. आर्थिक परिस्थिती सुधारल्यानंतर लाडक्या बहि‍णींना २१०० रुपये देऊ, असं महायुती सरकारने सांगितले. यानंतर आता मंत्री उदय सामंतांनीदेखील महत्त्वाचे वक्तव्य केलं आहे. लाडकी बहीण योजनेतील लाभार्थ्यांना २१०० रुपये देण्याबाबत वर्किंग सुरु आहे. ज्यावेळी यासंदर्भात निर्णय घेण्याची योग्य वेळ येईल, त्यावेळी महाराष्ट्र नक्की निर्णय घेईल. महिला भगिनी आणि शेतकऱ्यांच्या बाबत नक्की सहानुभूतीपूर्वक विचार करेल, असं उदय सामंत म्हणाले आहेत.

एप्रिलचा हप्ता जमा होण्यास सुरुवात (Ladki Bahin Yojana April Installment)

लाडक्या बहि‍णींच्या खात्यात एप्रिलचा हप्ता जमा होण्यास आजपासून सुरुवात झाली आहे. येत्या २-३ दिवसांत सर्व लाभार्थी महिलांच्या खात्यात पैसे जमा होतील. ज्या महिला अपात्र आहेत त्यांना या योजनेचा लाभ मिळणार नाही. लाडकी बहीण योजनेअंतर्गत तुम्हाला पैसे आलेत की नाही ते ऑनलाइन आणि ऑफलाइन पद्धतीने चेक करु शकतात. तुम्ही ऑनलाइन पद्धतीने मोबाईल अॅपवर जाऊन पैसे आले की नाही ते तपासू शकतात. तसेच ऑफलाइन पद्धतीने बँकेत जाऊन १५०० रुपये जमा झालेत की नाही ते चेक करु शकतात.