Sharad Pawar Sabha: 'देशात बेरोजगारी वाढली, शेतकऱ्यांच्या मालाला भाव नाही', सामान्यांच्या प्रश्नांवरून शरद पवारांची मोदी सरकारवर टीका

Sharad Pawar Kolhapur Sabha: ''शेतकरी मोठ्या प्रमाणात आत्महत्या करत आहेत. जीव जाणं ही साधी गोष्ट नाही. शेतीमालाला भाव नाही. शेतकऱ्याच्या डोक्यावर कर्ज आहे. नाशिकमध्ये कांदा उत्पादक शेतकऱ्यांना त्यांच्या घामाची किंमत मिळत नाही. कांदा हा जगात पाठवला पाहिजे. मात्र मोदी सरकारने या कांद्यावर प्रचंड कर बसवलेला आहे. बाहेर देशात या कांद्याला ग्राहक मिळत नाही. कांदा उत्पादक शेतकऱ्यांनी आंदोलन केली. पण केंद्र सरकार त्याकडे दुर्लक्ष करत आहे'', असं राष्ट्रवादीचे सर्वेसर्वा शरद पवार म्हणाले आहेत.

कोल्हापूर येथील जाहीर सभेत बोलताना ते असं म्हणाले आहेत. देशात वाढत असलेल्या बेरोजगारीवरून केंद्र सरकारला लक्ष्य करत ते म्हणाले आहेत की, ''या सरकारमध्ये लोक महागाईने त्रासले आहेत. आम्ही कष्ट करायला तयार आहे, घाम गळायला तयार आहे, आम्हाला नोकरी द्या अशी मागणी देशातील तरुण करत आहेत.''

शरद पवार म्हणाले की, ''दिल्लीमध्ये शेतकऱ्यांचे वर्षभर आंदोलन झालं. दिल्लीच्या सीमेवर शेतकऱ्यांनी कुटुंबासोबत आंदोलन केलं. मोदी सरकारने त्यांच्या सहकार्याने त्यांच्याकडे ढुंकूनही पाहिलं नाही. देशाच्या इतिहासात शेतकऱ्यांचा एवढा मोठा अपमान कुठल्याही सरकारने केला नाही.''  (Latest Marathi News)

शरद पवार पुढे म्हणाले की, ''मणिपूरमध्ये दोन समाजा संघर्ष आहे. आया बहिणींची धिंड काढली जात आहे. ज्यांच्या हातात सत्ता आहे, त्यांनी महिलांना सुरक्षा दिली नाही. आया बहिणींना सुरक्षा देण्याची ताकद ज्यांच्यात नाहीत, त्यांना सत्तेत बसण्याचा अधिकार नाही.''

ते म्हणाले की, ''आज सत्तेचा वापर विरोधी पक्षांच्या लोकांना त्रास देण्यासाठी होत आहे. तेरा महिने राज्याचा गृहमंत्री तुरुंगात जातो. त्यांना आमच्या गटात या असं सांगण्यात आलं, जर आला नाही तर, तुमची जागा तुरुंगात आहे, असेही सांगितलं.''