Raju Shetti News: राजकीय भूकंप वगैरे बकवास, त्यांचं आधीच सगळं ठरलंय, राजू शेट्टींचं राजकीय घडामोडींवर मोठं भाष्य

रणजीत माजगावकर

Kolhapur News : राज्याच्या राजकारणात लवकरच मोठा भूकंप होणार असल्याच्या चर्चा राजकीय वर्तुळात रंगत आहे. राज्यातील सत्तासंघर्षावरील सर्वोच्च न्यायालयाच्या निर्णयानंतर मोठे राजकीय पडसाद उमटण्याची शक्यता वर्तवली जात आहे. मात्र राजकीय भूकंप वगैरे बकवास आहे, असं स्वाभिमानी शेतकरी संघटनेचे नेते राजू शेट्टी यांनी म्हटलं आहे.

राज्यातील जनता महागाईने त्रस्त आहे. नद्या कोरड्या पडल्या आहेत. अवकाळी आणि गारपीटीमुळे शेतकऱ्यांचें मोठं नुकसान झाले आहे. या सगळ्यावरून लक्ष हटवण्यासाठी राजकीय भूकंप येणार अशा वावड्या उठवल्या जात आहेत, असं राजू शेट्टी यांनी म्हटलं. (Political News)

राज्याच्या विरोधी पक्ष आणि सत्ताधाऱ्यांवर जनतेचा विश्वास राहिलेला नाही. राजकीय भूकंप वगैरे बकवास आहे. जे काय करायचं हे यांचं आधीच ठरलंय. पण जनता आता कोणावरच विश्वास ठेवणार नाही, असं राजू शेट्टी यांनी म्हटलं आहे. (Latest News Update)

सरकार सगळ्याच बाबतीत राजकारण करतंय - राजू शेट्टी

महाराष्ट्र भूषण पुरस्कार सोहळ्यात घडलेल्या दु:खद घटनेवर बोलताना राजू शेट्टी म्हणाले की, महाराष्ट्र भूषण कोणाला द्यावा हा सर्वस्वी सरकारचा प्रश्न आहे. मात्र एवढा मोठा कार्यक्रम करताना बंदिस्त ठिकाणी करायला हवा होता.

निवडणूक डोळ्यासमोर ठेवून ही गर्दी जमवली गेली. 25 लाखाचा पुरस्कार द्यायला 13 कोटी खर्च झाले असे ऐकायला मिळतंय. दुसरीकडे नुकसान भरपाई प्रोत्साहनपर अनुदान पैसे नाहीत म्हणून थांबले आहेत. सरकार सगळ्याच बाबतीत राजकारण करायला लागलं आहे, असा गंभीर आरोप राजू शेट्टी यांनी केला आहे.