दीड फूट जागेवरून वाद टोकाला गेला; पोलीस कर्मचाऱ्यांकडून शेजारी कुटुंबाला बेदम मारहाण, गरोदर महिलेलाही सोडलं नाही

पोलीस कर्मचाऱ्याकडून कुटुंबाला बेदम मारहाण

तक्रारीसाठी ठिय्या आंदोलन

व्हिडिओ समोर आल्यानंतर पोलिसांत गुन्हा दाखल

रणजीत माजगावकर, साम टीव्ही

कोल्हापूरच्या हातकणंगले तालुक्यातील रुकडी येथे अंगणातील दीड फूट जागेच्या वादातून एका पोलिस कर्मचाऱ्यासह त्याच्या कुटुंबीयांनी शेजारी कुटुंबाला बेदम मारहाण केल्याचा गंभीर आरोप करण्यात आला आहे. या प्रकरणात गुन्हा दाखल करण्यास टाळाटाळ झाल्याचा आरोप करत आहेत. या प्रकरणानंतर पीडित कुटुंबाने हातकणंगले पोलीस ठाण्यासमोर ठिय्या आंदोलन केले. घटनेचे व्हिडिओ समोर आल्यानंतर अखेर गुन्हा दाखल करण्यात आला.

रुकडी येथील तनवीर मुजावर आणि खुदबुद्दीन मुजावर यांच्यात अंगणातील दीड फूट जागेवरून गेल्या अनेक वर्षांपासून वाद सुरू आहे. संबंधित जागा न्यायप्रविष्ट असून न्यायालयाने जैसे थे आदेश दिलेला असल्याचे पीडित कुटुंबाचे म्हणणे आहे. शुक्रवारी दुपारी वादग्रस्त जागेवर जेसीबीद्वारे काम सुरू असताना तनवीर मुजावर यांनी त्यास विरोध केला. त्यानंतर खुदबुद्दीन मुजावर आणि त्यांच्या कुटुंबीयांनी शिवीगाळ करत काठ्यांनी हल्ला केल्याचा आरोप करण्यात आला आहे. या मारहाणीत तनवीर मुजावर यांच्यासह त्यांची आठ महिन्यांची गर्भवती पत्नी आस्मा मुजावर, मुलगी हुमेरा आणि अब्दुल रहमान मुजावर जखमी झाले. जखमींना उपचारासाठी सीपीआर रुग्णालयात दाखल करण्यात आले.

तत्पूर्वी, उपचार सुरू असताना आरोपींकडून घरावर दगडफेक आणि मोडतोड करण्यात आल्याचाही आरोप करण्यात आला आहे. रात्री उशिरा तक्रार देण्यासाठी पीडित कुटुंब हातकणंगले पोलीस ठाण्यात दाखल झाले. मात्र, तक्रार नोंदवून घेण्यास विलंब झाल्याचा आरोप करत कुटुंबीयांनी पोलीस ठाण्यासमोर ठिय्या आंदोलन सुरू केले.

प्रसार माध्यम आणि नागरिकांच्या उपस्थितीत घटनेचे व्हिडिओ तपासल्यानंतर पोलिसांनी अखेर गुन्हा दाखल केला. या मारहाणीचे कथित व्हिडिओ सोशल मीडियावर व्हायरल झाल्यानंतर परिसरात संतापाची लाट पसरली असून, संबंधित प्रकरणाची सखोल चौकशी करून दोषींवर कठोर कारवाई करण्याची मागणी होत आहे.

दरम्यान, पोलिस कर्मचाऱ्यावर झालेल्या आरोपांमुळे या प्रकरणाकडे जिल्ह्याचे लक्ष लागले आहे. तपासात नेमके सत्य काय समोर येते याकडे सर्वांचे लक्ष लागले आहे.