Kolhapur : कोल्हापूरात थरार! मुलाने कुऱ्हाडीने केली बापची हत्या, सख्ख्या भावाचाही जीव घेतला, कारण फक्त…?

रणजित माजगावकर, कोल्हापूर

कोल्हापूर जिल्ह्यातील हातकणंगले तालुक्यातील हिंगणगावात शेतीच्या वादातून दुहेरी खून झाल्याची धक्कादायक घटना समोर आली आहे. या घटनेत वडील आणि मुलाचा निर्घृण खून करण्यात आला असून आरोपी मोठा भाऊ पोलिसांच्या ताब्यात आहे. या घटनेमुळे परिसरात खळबळ उडाली आहे.

मिळालेल्या माहितीनुसार, शितल मारुती कुंडले (४५) आणि त्यांचे वडील मारुती बंडू कुंडले (७२) यांच्यावर कुऱ्हाड आणि खोऱ्याने हल्ला करण्यात आला. या हल्ल्यात दोघांचाही जागीच मृत्यू झाला. जमिनीच्या वाटपावरून कुटुंबात सतत वाद सुरू होते. काल सायंकाळी पुन्हा वाद झाल्यानंतर संतापाच्या भरात मोठा भाऊ संभाजी कुंडले याने हा हल्ला केल्याची माहिती समोर येत आहे.

घटनेनंतर संशयित आरोपी संभाजी कुंडले स्वतःहून हातकणंगले पोलिसांत हजर झाला आहे. तर त्याचा मुलगा विवेक हा जखमी असून त्याच्यावर खाजगी रुग्णालयात उपचार सुरू आहेत. या प्रकरणात चार दिवसांपूर्वीच पोलीस ठाण्यात तक्रार दाखल करण्यात आली होती. मात्र वेळेत कारवाई झाली असती तर ही घटना टळली असती, अशी प्रतिक्रिया ग्रामस्थांकडून व्यक्त होत आहे.

घटनेची माहिती मिळताच पोलिसांनी घटनास्थळी धाव घेत पंचनामा सुरू केला असून फॉरेन्सिक पथकही दाखल झाले आहे. दरम्यान, या दुहेरी खुनामुळे संपूर्ण हिंगणगाव परिसर हादरून गेला असून पोलिसांकडून पुढील तपास सुरू आहे.