नगरसेवकांचा सभागृहात आनंदोत्सव सुरू असताना विपरीत घडलं; निष्ठावंत कार्यकर्त्याचा मृत्यू, नेमकं काय घडलं?

रणजीत माजगांवकर, साम टीव्ही

कोल्हापूरच्या महापौरपदी रूपाराणी निकम यांची निवड झाल्यानंतर काल सायंकाळी काँग्रेस पक्षाच्या वतीने अभिनंदन बैठकीचे आयोजन करण्यात आले होते. याच बैठकीत काँग्रेसचे नगरसेवक राजेश लाटकर यांच्या विरोधी पक्षनेतेपदासाठी पत्र देण्याचा कार्यक्रम छत्रपती ताराराणी सभागृहात सुरू होता. मात्र कार्यक्रमादरम्यान एक दुर्दैवी घटना घडली आणि आनंदाच्या वातावरणावर शोककळा पसरली.

महापलिकेमध्ये चार ते पाच वर्षांनी प्रशासकीय राजवट संपुष्टात आली आणि प्रत्यक्ष राजकीय कारभार सुरू झाला. याच पार्श्वभूमीवर काँग्रेस पक्षाने बैठकीचे आयोजन केले होते. बैठक सुरू असतानाच सभागृहाच्या बाहेर काँग्रेसचे नगरसेवक राजू लाटकर यांचे समर्थक अनिल रावळ हे उपस्थित होते. दरम्यान अचानक त्यांची प्रकृती बिघडल्याची माहिती मिळताच सभागृहात एकच धावपळ उडाली. ही बातमी समजताच महापौर रूपाराणी निकम, उपमहापौर आणि काँग्रेसचे सर्व नगरसेवक तात्काळ सभागृहा बाहेर धावले.

घटनास्थळी उपस्थित नगरसेवकांनी रावळ यांना तातडीने मदत करण्याचा प्रयत्न केला. नगरसेवक राजू लाटकर, विजय हेगडे, रोहित कवाळे आणि विनायक फाळके यांनी परिस्थितीचे गांभीर्य ओळखून क्षणाचाही विलंब न करता स्वतःची गाडी बोलावून अनिल रावळ यांना तातडीने रुग्णालयात हलवले. मात्र रुग्णालयात पोहोचण्यापूर्वीच वाटेत अनिल रावळ यांचा दुर्दैवी मृत्यू झाला.