आगामी विधानसभा निवडणुकीच्या पार्श्वभूमीवर मनसे अध्यक्ष राज ठाकरे मराठवाडा दौऱ्यावर आहेत. शुक्रवारी (ता. ९) त्यांनी बीड जिल्ह्याचा दौरा केला होता. यावेळी ठाकरे गटाच्या पदाधिकाऱ्यांनी त्यांच्या ताफ्यावर सुपाऱ्या फेकल्या होत्या. यामुळे मोठा वाद निर्माण झाला होता. आज राज ठाकरे हे जालना जिल्ह्याचा दौरा करणार आहेत. यापार्श्वभूमीवर पोलीस सतर्क झाले आहेत.
कुठलाही अनुचित प्रकार घडू नये म्हणून पोलीस प्रशासनाच्या वतीने खबरदारी घेण्यात आली आहे. राज ठाकरे (Raj Thackeray) जालन्यात येण्याआधी १० ते १२ मराठा पदाधिकाऱ्यांना पोलिसांनी नोटीसा बजावल्या आहेत. राज ठाकरे यांचा ताफा अडवण्याचा प्रयत्न कराल, तर थेट कारवाई केली जाईल, असा इशारा या नोटीसीतून देण्यात आला आहे.
भारतीय नागरिक सुरक्षा संहिता 168 प्रमाणे या नोटीसा बजावण्यात आल्या आहेत. महत्त्वाच्या व्यक्तीच्या दौऱ्या दरम्यान काळे झेंडे दाखवणे, निदर्शन करने, यासह महत्वाच्या व्यक्तीच्या गाड्या अडवल्यास कायदेशीर कारवाईचा इशाराही या नोटीसीतून देण्यात आलाय. यामुळे मराठा पदाधिकारी (Maratha Reservation) आणखीच आक्रमक होण्याची शक्यता आहे.
मराठा समाजाला सरसकट कुणबी प्रमाणपत्र देऊन त्यांना ओबीसीतून आरक्षण द्यावे, अशी मागणी मराठा आंदोलक मनोज जरांगे पाटील यांनी केली आहे. यासाठी त्यांनी शांतता रॅली देखील काढली आहे. राजकीय नेत्यांनी मराठा आरक्षणाबाबत आपली भूमिका स्पष्ट करावी, असं जरांगे यांचं म्हणणं आहे.
दरम्यान काही दिवसांपूर्वी राज ठाकरे यांनी आरक्षणाबाबत बोलताना मोठं विधान केलं होतं. महाराष्ट्रात आरक्षणाची गरज नाही, असं राज ठाकरे म्हणाले होते. त्यांच्या या विधाननंतर मनोज जरांगे पाटील आक्रमक झाले होते. दुसरीकडे प्रकाश आंबेडकर यांनी देखील आक्रमक भूमिका घेत राज ठाकरे यांच्यावर 'टाडा' अंतर्गत कारवाई करण्याची मागणी केली होती.
सकाळ+चे सदस्य व्हा
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.