नाद करा, पण 'बिजल्या'चा कुठं! शेतकऱ्यानं ११ लाखांना बैल विकला; घोड्यालाही घाम फोडणाऱ्या बिजल्याचा खुराक जाणून थक्क व्हाल

देशभरात बैलगाडी शर्यतीची क्रेझ वाढली आहे. देशभरात महागड्या बैलांना शर्यतीत उतरवलं जातंय. ही अनोखी शर्यत बघायला हजारोंची गर्दी पाहायला मिळते. महाराष्ट्रातील सातरा, सांगली भागासहित कोकणातही लाखोंचे बैल पाहायला मिळतात. शंकर पटात धावणारे हे बैल त्यांच्या मालकांना लाखोंची कमाई करून देतात. अशाच माध्यमातून जालन्यातील शेतकरी लखपती झाला आहे.

जालन्यात बैल विकून एक शेतकरी लखपती झाला आहे. जालन्यातील कानफोडी तांडा येथील पवन राठोड यांचा बिजल्या नावाचा बैल तब्बल 11 लाख 11 हजारांना विकला गेला आहे. सांगली जिल्ह्यातील कटरेवाडी येथील सागर कटरे यांनी हा बैल खरेदी केला आहे. घोड्यालाही घाम फोडणारा अशी बिजल्या बैलाची ओळख आहे. शंकर पटातला बैल असल्यानं बिजल्याला जास्तीची किंमत मिळाली आहे.

बिजल्याच्या आहारात काय असतं?

सकाळी 3 लिटर दूध, 100ग्रॅम बदाम, 1किलो उडीद डाळ, सायंकाळी रतीप खाद्य, मका भरडा, गहू भरडा, आहार देण्यात येतो. तसेच त्याला दर 2 दिवसांनी गरम पाण्याने पाणी आंघोळ घालण्यात येते.

कॅप्टनची १६ लाख ५१ हजार रुपयांना विक्री

काही दिवसांपूर्वी कॅप्टन नावाच्या बैलाची विक्री करण्यात आली होती. या बैलाच्या विक्रीतून मालकाला १६ लाख ५१ हजार रुपये मिळाले होते. छत्रपती संभाजीनगरमधील कन्नड तालुक्यातील वाकी या गावातील कॅप्टनला मध्य प्रदेशातील बैतुल गावच्या पशुप्रेमीने विकत घेतला. हिंदकेसरी कॅप्टन बैलाची १६ लाखात विक्री झाल्यानं त्याची जोरदार चर्चा झाली होती.